IFI Banda Aceh Bagi Santunan dan Peralatan Sikula keu Aneuk Yatim
Nasaja Berita | Ikatan Fisioterapi Indonesia (IFI) Cabang Banda Aceh, kalinyoe na sit meupeugot acara buka puasa bersama deungon meupeumulia 35 droe aneuk yatim nyang na di kawasan Banda Aceh dan Aceh Rayek, nibak uroe Sabtu, 15/3/2025. Geucok teumpat untuk acara di Hotel Rasamala Indah Banda Aceh.
Lagee nyang ka-ka, acara buka puasa bersama nyang geupeugot le IFI Cabang Banda Aceh, sabe na penyuluhan kesehatan. Kalinyoe geucok tema "Sosialisasi dan Pemeriksaan Hipermobilitas Sendi Pada Anak" nyang geupaparkan le Ftr. Humaira, SSt. FT.
Panitia Kegiatan, Luci Handayani, S.Fis., M.Kes peugah, kegiatan nyoe na peserta meu 75 droe Fisioterapis Aceh, seudang untuk dana santunan nyang geubagi keu aneuk yatim na dari donatur, sponsor dan Fisioterapis se-Indonesia.
Kegiatan nyoe geubuka le Wakil Ketua IFI Daerah Aceh Maisarah, Fis. Lam sambutan, Maisarah geuharap kegiatan lagee-lagee nyoe beujeut keu contoh dan beujiikot le cabang-cabang laen nyang na di Aceh seuhingga Fisioterapis jeut meubrie meunafa'at sebagoe wujud peduli ureung nyoe keu masyarakat.
Ketua IFI Banda Aceh, Ftr. Maidatul Akmal, S.Kes meupeugah nyang bahwa kegiatan nyoe kajeut keu agenda tahunan. Lam makna tiep thon ka geupubuet, dari thon 2018 uroe jeh.
"Alhamdulillah, nibak buleun nyang beurkah nyoe, tanyoe sabe ta upayakan untuk ta berbagi keu aneuk yatim. Dan nyoe jeut keu bentuk kepedulian geutanyoe para Fisioterapis," kheun Akmal.
Bahkan dari thon keu thon, meunurot Akmal, jumlah santunan untuk aneuk yatim sabe meutamah, alhamdulillah.
Nyang peurle teupu, seubagoe tambahan, IFI Banda Aceh kon sekedar meubantu santunan dan buka puasa, tapi na sit meubagi paket makanan ringan nyang sehat seurta peralatan jak sikula bagi aneuk miet nyoe.
"Jadi na paket nyang ta bagi, na lam bentuk makanan, buku gamba dan alat teumuleh, seulaen daripada peng santunan sebesar Rp. 500.000,- untuk tiep aneuk yatim dan makanan buka puasa teunte jih, nyang memang jeut keu kebutuhan awak nyan." tamah Akmal.
Deungon na ata-ata lagee nyoe, kheun Akmal, seulaen jeut keu amalan deungon harta, ileume dan tenaga bagi ureung nyoe, insya Allah, jeut keu buet peubahagia ureung laen, teutama aneuk yatim, nyang geusayang le Pangulee Alam Nabi Muhammad SAW.
"Nyoe nakeuh bagian dari tapeubahagia aneuk-aneuk geutanyoe nyoe, bah ceria dan seunang lam buleun puasa," geutop haba le Akmal. []
0 Response to "IFI Banda Aceh Bagi Santunan dan Peralatan Sikula keu Aneuk Yatim"
Post a Comment