Ka Gura! Abeh Jipiyoh Dum Peugawe Bak KPK. Pu Na Keujadian?
Nasaja Berita - Jakarta, Ka gura hai, abeh jipiyoh dum anggota peugawe Komisi Pemberantasan Korupsi (KPK) ban ka jipimpin le Firli Bahuri leumbaga nyan. Hana kureung bak 31 droe peugawe nang piyoh dari buleun Januari-September 2020.
Dari 31 droe peugawe nyang piyoh nyan, roh lam kawan nyan mantan Juru Bicara KPK Febri Diansyah.
Geupeugah le Pelaksana tugas (Plt) Jubir KPK Ali Fikri, masalah awak nyan jipiyoh nyan wajar that. Han jeut keu hai. Dan le KPK han jeut jak tham awak nyan supaya beu teutap jikeurija bak KPK.
"Seubagoe saboh organisasi, peugawe nyang ka jipiyoh nyan wajar that, lagee bak organisasi atawa leumbaga laen sit. Dan KPK meunan sit. Hanjeut keu hai, meunyo saboh hai nyang wajar." meunan calitra Ali Fikri lam keterangan nyang ka jituleh bak uroe Sabtu (26/9).
Dari 31 droe nyang piyoh nyan, na 24 droe seutatuh jih peugawe teutap, seudangkan nyang 7 droe teuk nyan peugawe hana teutap.
Meunyo klam catatan KPK dari thon 2016 sampe thon 2020 ka meureutoh droe awak piyoh keurija bak KPK nyan. Bahkan na 46 droe nyang piyoh lam thon 2016.
Seudang kan bak thon 2017, na 26 droe nyang piyoh, 2018 na 31 droe, thon 2019 na 23 droe.
Jadi bak geupeutren boh thek-thok, untuk geukira dan geuhitong ube na nyang ka piyoh, total jih 157 droe ka.
Meunyoe keu alasan pakon jipiyoh dum awak nyoe, meunurot geupeugah le Pak Ali nyan macam-macam dum alasan. Nyang paleng le alasan, nakeuh mita karir laen, di luwa KPK. Kadang hideh leubeh paih karir.
"KPK teutah geudukong meunyo na peugawe nyang hawa na karir di luwa KPK. Seubab nyan jeut keu saboh program nyang hana geuprogram untuk ureung nyan jeut keu agen antikorupsi eunteuk bak organisasi dan leumbaga laen. Pu lom ka sep pengalaman bak KPK." kheun gobnyan.
Meunyo Pak Nawawi Pomalango seulaku wakil Ketua KPK peugah na 37 droe mandum dari buleun Sa baroe. 29 droe nyang peugawe teutap, 8 droe nyang peugawe hana teutap.
Pakon beda-beda total jumlah jih nyang geupeugah, nyan hom. Kadang beda kolotor geupakek, saboh ata Jepang, saboh ata Cina. Jadi ban geupeutren boh thek-thok, kakeuh hana saban jitren. Hom geuh hinan.
Meunan Apa baca bak CNN Indonesia beuklam.
0 Response to "Ka Gura! Abeh Jipiyoh Dum Peugawe Bak KPK. Pu Na Keujadian?"
Post a Comment