Bupati Aceh Timu: Meunyo Bateu Bangun Jalan, Nyan Keubiet Beungeh Kuh
Nasaja Berita - Idi, Bupati Aceh Timur, Hasballah M. Thaib, atawa nyang leubeh masyarakat turie deungon nan Rocky, that brat geuharap supaya jalan lintaih Peureulak Lokop di Aceh Timu nyang tumboih keudeh u Gayo Lues, haruih seureuta wajeb, beusigra jadeh terealisasi demi kedaulatan rakyat.
"Meunyoe nyan pembangunan jalan jipeubateu, h'an jadeh jikeurija, nyan ka jadeh beungeh long. Jeh kalon kibab di Lampung, Palembang, pakon ek maju jinoe. Leupah hayeu ka? Sit hana laen, infrastruktur ka bereh. Jalan nyang paleng utama." meunan kheun Rocky watee di Gampong Barat, Peureulak Barat bak uroe Sabtu, tanggai 12/11 baroesa.
Teuman nyan pu beungeh keubiet atawa peugah sagai beungeh? Meunurot Apa kalon, bengeh keubiet. Dum tingkat Geuchiek lam gampong, meunyo bateu pembangunan jalan lam tingkat jurong pih, jiteumee kr'op muka geuh dum, seubab teuingat keu rakyat lam gampong. Pu lom bupati. Sang brat keu meunan bak Apa takat.
Meunurot Bupati Aceh Timu, meunyo trok bak pembangunan jalan jipeutheun-peutheun, nyan sit tok rakyat nyang rugoe. Padahai nyang jeut keu tujuan poemerintah peuseujahtra rakyat. Kiban ilee. That na teuh.
"Jeh daerah gob abeh maju dum deungon na pembangunan. Pakon tanyoe ek lambat sabe, hana jawaban laen, sit tok gara-gara pembangunan lambat, meutheun hinoe, meutheun hideh dum. Pah jra teuh kiraju." sambong Rocky.
"Long seulaku Bupati, keupala daerah Aceh Timu, teunte peurlee that keu pembangunan. Seubab ekonomi masyarakat leubeh bagah maju. Pu lom lam masa pandemi meunoe, rata sagoe meumasalah ekonomi." lanjot gobnyan lom.
Lheuh nyan lom, Hasballah M. Thaib geudukong abeh buet untuk peujadeh jalan tol dari Lhokseumawe nyang tumboih keudeh u Lampung. Seubab lheh geukira-kira, meunyo jalan tumboih keudeh, nyang u Jakarta lam dua uroe ka meutipek keudeh.
"Jalan tol tumboih Jakarta, lam 2 uroe trok ta jak. Ube na hase alam keumah ta kirem. Uroe nyoe jipesan, singoh lusa meutipek u Jakarta. Nyang kaya soe? Awak droeteuh Aceh sit. Rakyat."
Brat hie keu beutoi beungeh geuh. Hai kali-kali timang that menyo keu bhaih jalan. Adak Apa pike meunan sit, meunyo jalan lagee pliek, meukeuliep lheuh buet teuh kiraju. Sapu h'an jalan. Pu jameun nyo jeut meunan-meunan. Nasaja kiraju.
Apa baca bak AJNN, beuklam. Adak teulat Apa apeudet bek that neukheun sapu. Neu peuseumangat kuh. Mangat ek ta peuudep portal berita lam Basa Aceh. Sit nyoe khong nyang paleng bereh bak tuleh berita lam basa droeteuh.
0 Response to "Bupati Aceh Timu: Meunyo Bateu Bangun Jalan, Nyan Keubiet Beungeh Kuh"
Post a Comment