Rumoh Beut Nurul Ayman Sie Kureubeun, 2 Boh Kameng, 3 Boh Leumo
Nasaja Berita - Banda Aceh, Rumoh Beut Nurul Ayman, Banda Aceh lam uroe raya haji kalinyoe meuteumee kureubeun lhee boh leumo, dua boh kameng. Raseuki tuhan brie. Meunan Apa baca bak sidaknews uroe Seulanyan baroe tanggai 3. Uroe nyoe ka Lasa tanggai 4.
Jadi meunurot info hinan, proses sie kureubeun hinan di keu rumoh beut. Nyan sit ka meupakat ureueng nyoe wali santri ngon tokoh masyarakat sinan, aneuk muda gampong. Jadi seukalian ju meukhanduri bacut sapoe dari sie kureubeun nyan. Jeut keu teumon bu cot uroe, rame-rame magun sinan. Na sit padum-padum droe dari gampong di geunireng nyan, gampong Mulya. Hai seucara rumoh beut nyan karap paih bak ceu gampong jiduek. Lagee haba itu ju.
Meunurot geupeugah le Tgk Ridwan Calok seulaku pimpinan rumoh beut nyan, nyang juga sidroe keutua Alumni Dayah Ummul Ayman Samalanga (Dayah Waled Nu), IKABUA meunyo jisingkat, “Kalinyoe na kameng 2 boh dari wali santri nyang geuseudeukah keu kureubeun sinoe bak rumoh beut. Lheuh nyan na sit leumoe 3 boh ata seudeukah kureubeun syedara tanyoe sideh di Malaya." Meunan Teungku Wan peugah.
"Ureueng nyan na tujoh geuh, geumeupakat bloe leumo. Jadi ta bagi sie kureubeun leumo nyan disinoe. Na meu 250 boh tumpok sie ta bagi. Nyan keu aneuk jak beut sinoe, janda gasien dan aneuk yatim di gampong Peunayong nyoe, dan ureueng-ureueng nyang jeut ta brie kupon jatah cok sie." Nyan ban bak geupeujeulaih le Teungku Wan.
Hai nyoe kon keuphon na kureubeun bak rumoh beut Nurul Ayman. Thon ka leupah na sit, lhee boh kameng. Kalinyoe ka lhee boh leumo. "Adak meujeut ukeu beutamah lom. Dan beu ridha Allah keu geutanyoe mandum. Terutama keu nyang meukureubeun." Lanjot Teungku Wan.
Teungku Ridwan Calok geu sampaikan terimakasih nyang luar biasa keu mandum pihak. Keu ureueng seudeukah kureubeun, beu jroeh dan meureumpok pahala singoh uroe dudoe, keu aneuk muda gampong dan masyarakat Peunayong nyang ka saban-saban tem keurija, mulai dari seumeusie sampoe magun ngon pajoh. Mandum geuterimakasih. Keu-keu jamee geu sampaikan terimakasih le Teungku Wan.
Phon Apa pike, pu pasai terimakasih keu jamee, ka ta brie le geutanyoe, ta terimakasih lom. Rupajih, kiban han ilee, ci keuh sangkira hana trok jamee atawa le jamee han geutem pajoh beu abeh makanan ata ka ta tagun, hoe ta keuneuk ba. Kon rugoe tok-tok. Makajih beu na terimakasih. Memang nah bereh teungku Wan. Nyan ka Apa teken, Imum Seumijid Peunayong.
Lom pih lam minggu baroesa, Apa deungo, Teungku Wan ka teupileh lom keu keutua IKABUA lam Mubes. Nyoe ka periode keu lhee 2020-2022. Nyan dum geupeucaya le ureueng nyoe alumni-alumni dayah Ummul Ayman keu Teungku Wan. Nyan cap Teungku Ridwan Calok kiraju.
0 Response to "Rumoh Beut Nurul Ayman Sie Kureubeun, 2 Boh Kameng, 3 Boh Leumo"
Post a Comment