That Pangeh! Nam Droe Jibeureukah Peulisi Gara-gara Peng Palsu
Nasaja Berita - Aceh Timu, Alahai anek mutuwah, manyak keuh mantong ka mulai peulangue ureueng tuha lam gampong. Pu ka peugot buet ka kajak meubloe ngon peng paleusu. Nyan ka kalon, ka jibeureukah keuh. Kon sayang teuh keu ureueng syik di rumoh. Sayang teuh sit keu cewek awak droekeuh ban jikalon cut bang jih nyan peukateun. Alah ma beh teuh.
Nyang sayang teuh nah, dari nam droe nyan, na nyang umu jih mantong reutak aneuk miet sikula. Geupeugah le Pak Peulisi Kasat Reskrim Polres Aceh Timur AKP Dwi Arys Purwoko, uroe Hameh baroe, dari nam droe awak nyan, na lhee droe nyang mantong bajiek that.
Nam droe nyan nakeuh AN (15) pelajar, SA (16) pelajar, RZ (16), MT (35), AM (34) dan NS (34). Nyan man nam jih awak Gampong Baro, Kecamatan Samudra, Kabupaten Aceh Utara. That jipeumale-male gampong.
Jadi meuteupu keujadian jih watee awak nyan jimeubloe bak kioh sideh di Gampong Matang Kumbang, Kecamatan Simpang Ulim, Aceh Timur, bak uroe Seulanyan tanggai 8 baroesa. Nyang tukang meubloe nyang keuh nyang bajiek-bajiek nyan, AN, SA dan RZ.
Jibloe pisang gureng limong ribee, jibjok peng on limong ploh. Ban lheuh geubalek peng, geupareksa teuk le bang Mustafa seulaku ureueng meukat. Geupeurhati, sang meuhie keu palsu. Maken geukalon, maken hana yakin keu peng nyan. Ban ji s'ah le hate geuh bahwa nyan palsu, beh pane na, laju geupeucrok. Dan raseuki bang Tapha, meuteumeung awak nyan bak jalan. Jiteume abeh minyeuk honda seubab. Raseuki bang Tapha, kajai awak nyan. That meuramah somprong kiraju.
"Di bang Tapha geupeutoe ju awak nyan, geu geureuntak dua go sahoe, ka jimeungaku bahwa nyan peng palsu dan jijak peulangue ureung meukat pisang gureng lam minyeuk tanoh. That na teuh." kheun Pak kasat nyan.
Lheuh nyan awak nyan meuba ju keudeh bak Polsek Simpang Ulim, le pihak Polsek Simpang Ulim jihu peukara nyan kemudian keudeh u Unit III (Tipidter) Satreskrim Polres Aceh Timur untuk jipareksa leubeh lhok lom.
Rupajih keubiet nyo. Awak nyan lhee jiteume peng nyan, ata jijok le MT. Hana jipeubree le. Le peulisi laju jijak mita MT u rumoh. Si MT jipeugah ata bak AM. Jak lom peulisi bak rumoh AM. Hinan meusigo ngon si NS jibeureukah. That na teuh.
"Nyan han meumada 'oh nan. Seubab le si AM jipeugah jicok peng nyan bak HS warga Gampong Baro, Kecamatan Samudra, Kabupaten Aceh Utara. Nyan si HS ka DPO jih. Teungoh ta peucroek jih." kheun Kasat Reskrim nyan lom.
Keu barang bukti, na peng on 50.000 rupia lhee on. Honda SupraX125 saboh. Nyan di honda nyan pih meu lumboi plat tan. Kakeuh lagee haba itu ju. Nyan mandum jih keunong pasai. Aleh pu pasai pih hom. Nyan urusan awak peulisi ngon awak hukom.
Meunan Apa peuphom haba nyang jituleh le Asrul seulaku jurnalieh bak AJNN.
0 Response to "That Pangeh! Nam Droe Jibeureukah Peulisi Gara-gara Peng Palsu"
Post a Comment