Poe Akun FB Abu Malaya nyang Kheun PKI keu Pak Nova Ka Jibeureukah le Peulisi
Nasaja Berita - Banda Aceh | Alahai ma beh teuh, hana meupu cap, hanjeut keu raka'at, atra batat that bak meu'en peseubok. Nyan ta kalon, ka jibeureukah le peulisi. Makajih bek that ta jungkat beurangkahoe. Pu lom tajak khen PKI atawa ta peukaphee gob. Beurangkasoe jih. Lheuh desya, meuurusan sampoe tamong penjara lom.
Abu Malaya ka jibeureukah le awak Kepolisian Resort (Polres) Pidie Jaya. Satnyoe malam, malam Hameh, 17 Juni, Apa teume informasi, Abu Malaya atawa RA ka jibeureukah. Tok gara-gara jak kheun PKI keu Pak Nova Iriansyah seulaku Plt Gubernur Aceh.
Geupeugah le Pak Kapolres Pidie Jaya, AKBP Musbagh Ni'am lam konferensi pers sinan bak Mapolres bunoe, RA nyan nakeuh poe akun peseubok Abu Malaya nyang baroesa jitakat Plt, jikheun PKI.
"Nyan terduga pelaku nyoe, ka jijak peu ek bak facebook, bak tanggai 7 Juni baroe. Asoe itatih jih ngon-ngon poto, jijak peugah pak Plt Nova Iriansyah nyan bagian dari PKI. Padahai PKI nyan hanjeut na le di Indonesia. Organisasi atawa partai nyan ka terlarang. Nan akun memang Abu Malaya, tapi RA nyang poe dan ngui akun nyan." kheun AKBP Musbagh.
Kapolres Pidie Jaya peugah, RA nyoe memang tinggai di Pidie Jaya, tapi geubeureukah sideh di Meulaboh. Nyang bereukah jih pih awak Satreskrim Polres Pidie Jaya.
memang si RA nyoe ban jiwoe dari Malaysia. Lheuh nyan jiduek di Pidie Jaya. Nyan keuh di Pidie Jaya posisi jih watee jipeuek itatuih ngon poto bak Plt. Dudoe baro jibalap u Meulaboh. Bak sang jikeuneuk peukeulabe peulisi. Tapi han hase.
Geupegah le Pak Kapolres RA disangka ngon pasal 28 ayat 2 Jo 45 a undang-undang ITE, hana kureueng bak 5 thon ancaman penjara. That na teuh, peng di Malaya golom ta peu abeh, ka payah ta peuabeh umue lam penjara meupadum thon. That kanjai biet.
"Si RA nya ata jipeugot keudroe konten nyan, itatuih keudroe, poto pih jipeugot keudroe, lheh nyan jiapeulod kedroe lom. Jadi kon jibagikan ata gob. Punoh ata droe tok-tok. Nyang keuh hinan brat meukarat lom jih. Nyoe teungoh ta pareksa sit, pu na jaringan jih, kadang soe-soe na ngon jimeupakat buet-bet meunan." kheun pak Peulisi.
Jadi, kheun pak Kapolres, nyan organisasi PKI nyan ka hana le di Indoneh. Ka dari thon 1965 ka getham na PKI nyan. Dan ka abeh sampe bak ukheu. Jadi bek na le nyang jak kheun-kheun keu gob PKI. Seubab hana le PKI nyan sinoe bak tanyoe.
"Jadi meunyo na nyang jak kheun PKI keu gob, salah-salah sit ta proseh mandum seucara beutoi. Sesuai deungon hukom dan prosedur hukom lam nanggroe geutanyoe nyoe." Nyan ban tegai Pak Kapolres Pidie Jaya, AKBP Musbagh Ni'am.
Meunan Apa baca bak AJNN nyang jituleh le Muksalmina, nyan poto ata jikodak le muksal sit.
0 Response to "Poe Akun FB Abu Malaya nyang Kheun PKI keu Pak Nova Ka Jibeureukah le Peulisi"
Post a Comment