Pakat Peugot Meunasah, Abdullah Puteh Silaturrahmi Ngon Warga Aceh di Solo
Nasaja Berita - Solo, Nyan ban, lheuh geudeuk jep kupi ngon padum-padum droe tokoh Aceh di Solo, rupajih le Senator Aceh Ir Abdullah Puteh atawa Bang Lah geusambong duek lom bak malam Jeumeu'at beuklam, 11 Juni 2020 deungon ureueng Aceh nyang na di Solo. Kalinyoe leubeh rame lom nyang duek. Hai ka leubeh waploh droe, kon ka rame. Hana sie malam baroesa peut geuh sagai.
Duek ureueng rayek kon lagee duek geutanyo jak poh beurakah. Ureueng tanyoe lam ranto, watee duek na pu peugah nyang jeut keu meunafa'at bagi ureueng lam ranto nyang na di kawasan.
Jadi lam duek pakat nyan na tokoh dari HIMAS (Himpunan Masyarakat Aceh Solo Raya) na sit nyang dari mahasiswa IPMASKA (Ikatan Pelajar dan Mahasiswa Aceh Surakarta). Bak duek nyan geumeuceukot keu masalah peudong meunasah Aceh di Solo. Keu mangat meusaboh masyarakat Aceh sideh. Jadi adak keuneuk duek rapat sabe-sabe Aceh, ka na teumpat droe. Tinggai jak bloe kupi saboh ciriek, ruti TB saboh bungkoh, bada meusaboh paruk, ka meumada. Meunan lah meukeusud haba dari ketua HIMAS Teungku Haji Iskadar. Meunan sit adak ta peugot khanduri mulod dan laen-laen.
Seulaen meunasah, nyang mahasiswa pih jipeuga bahwa peurle sekretariat, jeut jimeuduek awak nyoe sinan. Jipeugot program macam-macam dan jeut keu jitinggai droe dua mahasiswa tanyoe disinan. Pu lom panyang that dan trep ka seujarah ramee ureueng Aceh di Solo dari jak sikula sampe na nyang ka tuha.
Awai bahkan na geubentuk Ikatan Putera Atjeh Surakarta di Surakarta, tanggai 13 Maret thon 1955 nyang duek keu keutua phon jameun Sjahbudin Mahjudin, Sekretaris T. Abdullah Ubit. Jinoe baro meugantoe nan keu HIMAS.
"Insya Allah meunyo ka na meunasah ka leubeh mudah. Pu keuh na trok pejabat, masyarakat atawa soe laen dari Aceh, ka na teumpat untuk ta duek dan jeut keu teumpat silaturrahmi sabe droe. Hai seulaen keu teumoat seumbahyan, teunte jih " kheun Keuta HIMAS nyan.
Le keutua IPMASKA, Jiyah Ahmad Khalid pih meunan sit geupeugaj. Beu na perhatian keu mahasiswa nyang na di Solo. Beu lagee awak di daerah laen sit.
"Bek sampe kamoe nyang di Solo nyoe lagee aneuk ui. Hana meusoe kalon pih dari pihak poemeritah droeteuh. Nyoe katroek Pak Lah, kamoe seunang that. Ka neutem kalon kamoe, ka neudeungo keluhan kamoe." Kheun Jiyad.
Le Pak Lah geusimak haba ureueng nyoe, dan geupeugah akan geupeutrok h'eut dari masyarakat dan mahasiswa Aceh di Solo keudeh bak poemerintah Aceh. Dan akan geulake bak poemerintah Aceh supaya beubagah geugrak buet. Jeut keu saboh prioritas bagi poemerintah.
"Mahasiswa nyoe nakeuh adet bagi bangsa. Nyang muda-muda uroe nyoe singoh akan jeut keu pemimpin nanggroe. Jadi nyoe pu nyang ureueng droeneuh sampaikan bak lon kan lon perjuangkan keudeh bak poemerintah Aceh dan poemerintah pusat. InsyaAllah." Kheun Pak Lah Puteh.
Seulaen nyan, Abdullah Puteh geuharap supaya ureueng Aceh di Solo, pu keuh nyang tuha atawa nyang muda, beusabe meusaboh droe. Beuseureng silaturrahmi, mangat kompak.
Lam duek nyan na sit geujak Mukhlis Ismail, Syarief Tarmizi, Haji Adi Fa seulaku ureung tuha Aceh nyang na di Solo. Ureueng tuha nyang ka jipeutuha. Dan na sit Razali Ismail Ubit nyang kalinyoe akan ek keu calon Wakil Walikota Surakarta. Nyan gobnyan ureueng Aceh. Asli darah Aceh. Nyan ban neukiraju. Jroeh that. Doa bak Apa beujroeh sabe lam ranto.
0 Response to "Pakat Peugot Meunasah, Abdullah Puteh Silaturrahmi Ngon Warga Aceh di Solo"
Post a Comment