Gara-gara Leumoe Ban Saboh Aceh Gabuek Ureueng keu Bhaih Leumoe
Nasaja Berita - Banda Aceh, Lam lhee uroe nyoe ka, abeh gabuek ube na ureueng Aceh keu bhaih leumoe. Nyang gura, lam kawan gabuek ureueng gabuek nyan, na nyang meudaleh keu leumoe. Aleh kiban cara. Ukuran adak Apa bak meupike pih mumang, bak meupeugah pih leubeh mumang. Kiban cara ek jeut keu mumang bak meupike keu leumoe gara-gara leumoe. Jadi nyoe leumoe, toh leumoe, pu leumoe, seupoe leumoe atawa soe leumoe? Roh ta tanyong meunan neukiraju.
Nyoe kon meujak kheun keu ureueng leumoe beh. Bek eunteuk hana meupat-pat ka jeut keu masalah. Masalah nyang ka na han ek ta peuglah lom, han keumah ta tamah masalah. Nyoe meupeugah nyang bahwa Apa mumang pike keu leumoe droe. Seubab peng yum leumoe meugang baroesa hana glah lom. Ka meutamah gabuek keu bhaih leumoe di ureueng Aceh lam peseubok. Sampe na nyang tuleh lam itatuih peseubok baroe, meunoe, "uroe nyoee lam peseubok hoe nyang ta eu leumoe." Aleh so pih nyang kheun hanjeut that ta peugah. Neukalon keudroe ju bak peseubok Apa, meusoe keudore. Nyang soe han Apa peugah soe.
Nyoe bek neupike keu berita beh. Adak keewa atawa mumang neukira ju teungoh Apa peukap mumang urueng pike keu leumoe deungon mumang Apa nyang pike keu yum leumoe hana glaih lom ka inoehat uroe. That geusoh ku dih.
Jadi meunoe, bek biet it meutamah mumang bak neubaca, sampe singoh ka han neutem baca le Nasaja Berita, Apa peugak bacut. Jadi baroesa, seukitaran uroe Lasa nyan na info nyang bahwa leumoe dari dinaih Peternakan Aceh di Sare, na nyan tewaih bak jidong. Mate keudore gara-gara tan eumpeun. Neukiraju keu pijut leumoe ngon si Doyok nyang meu'en phelem sajan si Kadir seugitu sahoe. Atawa ngon si Chungkring bak phelem Jaka Tarub ata bak RCTI awai. Meu adoe-aduen ju takalon badan. Nyan keuh dum pijueut leumoe.
Teuman kon gura, seubab lam haba baroesa nyan, meu miliyar peng jatah keu leumoe. Teuman nyang keujadian leumoe jiteume deuk. Aleh han sep peng dumnan keu naleung leumoe pih hom. Nyang ka pasti ilee, bak sang Apa rasa seulaku ka sep pengalaman lam bideung leumoe meu leumoe, yum naleung keu peunajoh leumoe adak meu reutoh neuk, han abeh meu Miliar.
Na nyang kheun sit bak komen-komen peseubok baroe nyan. "Pu ka di poemeritah, ka takheun bantuan sembako han seip keu gizi, keu naleung leumoe pih hana timang. That geu meu leumoe kiraju." Nyan teutap han jeut Apa peugah soe komen. Meunyo peurle, panto keudroe bak peseubok Apa. Aleh na jitandai aleh tan pih hom. Nyang inti leumah nyata na awak tuleh meunan.
Na saboh teuk nyang gura lom. Na nyang peugah nyang bahwa gara-gara keujadian leumoe jiteume mate deuk di nanggroe teuleubeh ateuh rueng donya nyoe, na can beungeh si Mithun ngon Amitabachan sideh di India. Seubab sideh di India, bek takheun keu leumoe jiteume deuk, trok bak bajee baro uroe raya jiseudia. Nyan dum singet teuraje awak nyan. jiteume putoh teurajee keujadian lam nanggroe geutanyoe. That geup'uep daih kiraju. Nyan tuto nyan laporan intelijen Pyongyang keu Apa Raban. Han neupateh na nyang peugah nyan. keudeh bak Kim Jong Un neujak peusaheh. That na teuh.
Cek-ricek satnyoe bak AJNN ata jituleh le Rahmat Fajri nyang bahwa geuakui le pak keupala UPTD IBI Saree nyang bahwa ka dari buleun lhee baroesa ka hana le ji brie konsentrat [tambahan eumpeun mangat tumbon leumoe]. Teuman ek jeut keu buet. Meusigo ngon corona rupajih. bala keu manosia, keu-keu leumoe jiteume mate bak jidong tan umpeun. Paih ateuh bareh paih.
Boh ka bek panyang that. Uroe nyoe Apa meujak cah rauh keu dara aneuk kumuen sidroe. That jikarat neukiraju. Bek sampe jiteume mate leumoe Apa, tan jiteume meukhanduri kawen jih pih. Nasaja kiraju keujadian lam nanggroe.
Kheun Adoe Da Mulah nyang agam, "Glah bak misee meukumat bak janggot. Han bereh ata kee, ku tuneuk keuh si uroe supot."
0 Response to "Gara-gara Leumoe Ban Saboh Aceh Gabuek Ureueng keu Bhaih Leumoe"
Post a Comment