Tamah Kupi SIkhan, Calitra Sosialisasi Bèk Teupèh Virus Corona (1)

Nasaja Berita - Budaya, "Farid, bèk that kajak meu'èn internet bak keudè Apa Baka. Pré Sikula geuyue duek di rumoh. Nyan nyo keunong peunyakét ntreuk ho tajak? Rumoh sakét punoh. Ubat hansép. Nyo keunong kah sidroe, di ék bak Ma, bak Yah, bak Adoe keuh. Han sayang?" Kheun Ma bak si Farid watèe ban bungoh ka keumah ngon-ngon hapé bak jaroe, bajèe kaôh biru, sileuweue Li, keunira ijak bak Keudè kupi.

Seu-ôt Si Farid sira ji buka pintô, "Hana peue susah hai Ma, bak tanyoe hana lom viruih nyan. Sidéh di Jawa sagai. Nyan pih na nyang puléh watèe keunong, hana maté mandum".

"Hana maté nyo teungoh hana ramè keunong. Nyo ka ramè soe keuneuk hiroe lom? Meu kama bak rumoh sakét hana murumpok lé."

"Umu bak Po teuh, hai Ma."

"Nyo ka tapulang mandum bak Po, meu ie hana payah tajib lé. Nyo geukheun lé Po teuh han grah, kon hana grah?"

Si Farid hana ji deungoe. Laju jijjak bak keudè Apa Baka. Lam keudè asap rukok meukeupông. Ureueng jib kupi pancông ngon pajôh bada meugura-gura geupeugah bhaih Corona. Sang cit viruih nyan di takôt keu Tgk Apa. Peue mayang, bangsa Acèh teuleubèh ateuh rueng dônya. Haba-haba nyang teudeungoe bak keudè pih got that mamèh. Meunurôt ureueng lagèe sufi. Hana sagai lé cinta keu dônya. Kasiap maté. Teukhém meukèh-kèh sira geuprôh asap rukok ateuh muka ureueng lingka.

"Di kèe (Aku dalam logat kasar), leubèh got maté lam seumeujid, daripada hana kujak seumeujid." Prôh Apa Jali sira geubuliet bakông ateueh mèja kupi.

"Pajan di drokeuh kajak Seumeujid? Meukon seumayang wajéb uroe jeumeu'at, seumayang sunat uroe raya?" Tampoe Apa Ma'un.

"Kon meunan tapeugah ilèe, suai pajan tajak hôm teuma."

Peue tan geuteupeue di Apa Jali, keunong viruih kadang butôi bak seumeujid, tapi maté kon goh teuntèe? Kadang cit lam kama manoe bak rumoh sakét?

Si Farid nyang teuduek bak mèja di sampèng ureueng nyan meu anggôk-anggôk ulèe. Sang Kabutôi that ata Apa Jali peugah. Makén seumangat di duek bak keudè.

"Tamah kupi sikhan, Apa!" Si Farid ji kuweuet jaroe bak Apa Baka.

Hana tréb, Trôh si Fauzan jijak bloe saka. Fauzan ngon si Farid saboh sikula.

"Jan, ho meukarat? Kaduek ilèe, hai. Wi-Fi that lancar nyoe." Pakat si Farid bak Si Fauzan.

"Rid, di kèe kujak woe. Yah si Nabil ka geuba rumoh sakét buklam. Batôk parah. Nyoe ka seusak naph'ah. Si Nabil ngon Ma jih han dibi toe-toe. Kah baroe toe that kaduek ngon si Nabil kon? Kèe han ék toe-toe ngon kah lé."

Fauzan di pudép honda langsông di woe. Farid hana rè, dibayeue kupi meukarat di woe u rumoh.

"Maaa... Maa.... Neubuka laju pintô!"

"Pakon awai that kawoe? Peuejeuet hana ka kuhok bak keudè meu 3 jeuem 4 jeuem?" Ma geutumpang keu-ieng bak babah pintô.

"Ma, Yah si Nabil ka keunong Corona. Kadang bak badan si Nabil na cit, lôn baroe kuduek ngon jih bak keudè." Farid meukhot-khot bak i ceurita.

Bhuuum! Ma geusumpom pintô.

"Jak kah-kah laju bak rumoh sakét. Bèk ka tamong lé keunoe nyo goh kaba surat kesehatan. Han ék kupeutimang di lôn. Aneuk kuh kon kah saboh. Adoe keuh ramè. Maté kah na laén di lôn. Ata kupeugah hana ruhung glinyueng."

Kabéh.

Keunarang @Ismi Marnizar

Share this post