Isra` Mi'raj, Momentum Ta Peubèrèh Kualitaih Seumbahyang

Nasaja Berita - Agama, Meunyo lam thôn-thôn ka leupah, tanyoe mandum teuh sadar nyang bahwa malam uroe 27 Rajab nakeuh saboh uroe nyang mulia. Seubab nibak malam nyan Nabi geutanyoe mulia, Muhammad Saw neupeujalan lé Allah ta'ala u Mesjidil Aqsha sampoe sidratul muntaha. Blah déh langèt keue tujôh. Peristiwa nyan, nyang mandum geutanyoe teupu deungön nama Isra dan Mikraj.

Teuma lam thôn nyoe, perayaan Isra dan Mikraj lam nanggroe tanyoe teungöh kureung gah. Nanggroe teungöh gabuk deungön wabah virus corona. Lé poemerintah ka geupeuteubiet himbauan. Supaya tanyoe bèk that seuréng ta meusapat lam ureueng ramè. Teuntè nyan demi kemaslahatan umat manusia. Seubab wabah virus corona nyan mudah that tersebar lam kawan ramèe. Le ka nanggroe lam dônya teungöh menderita. Rôh Indonesia lam kawan nyan.

Bah pih meunan geutanyoe bèk sagai-sagai ta tuwö keue peringatan Israk dan Mikraj. Ka h'ana ta rayakan deungön dakwah islamiyah, ceuramah atawa khanduri di seumijid dan di meunasah, teuntè seucara pribadi, geutanyoe jeut ta peuingat, ta peurayek uroe nyang mulia nyoe.

Lam seujarah, Isra dan Mikraj nyoe keuh nyang jeut keue seubab trôh syari'at seumayang keue geutanyoe umat Nabi Muhammad. Seuréng ta deungö riwayat kiban mulia syari'at seumbahyang neucok lé Nabi, langsông bak Allah ta'ala sidéh di Sidratul Muntaha.

Keue geutanyoe umat, ta cok momentum peringatan Isra dan Mikraj nyoe beu jeut keu saboh peulajaran untuk ta lhôh keulayi, kiban ka kualitaih seumbahyang geutanyoe. Pu keuh ka beutôi syarat ngön rukôn, pu keuh ka bèrèh tata cara, pu keuh ka timang adab lam seumbahyang.

Bagi nyang seulama nyoe mantöng le tinggai seumbahyang. Kajeut mulai kembali.  Ta useuha bèk sampé tinggai lé ukeu teuma. Meunan sit ata nyang ka tinggai, ta azzam lam haté, supaya beu ék ta qadha. Seubab nyan na keuh utang geutanyoe hamba deungön Poe teuh Allah ta'ala.

Seumbahyang nyoe nakeuh peukara nyang peurlè ta apeugrèd (upgrade). Dari golom, kajeut peuphôn. Nyang seuréng tinggai, kajeut peupunoh limöng watèe lam si uroe si malam. Nyang ka taubat, hana lé tinggai, kajeut mulai qadha ata awai.

Seumbahyang nyoe peurlè ta yu paréksa sinoe lam dônya. Mulai dari niet, geurak lam seumbahnyang beutimang dan samporna. Bacaan mulai takbri bak awai, fatihah, tahyeut, seulaweut ngön saleum bak seuneulheuh beu rôh ta baca.

Nyang ka timang seumbahyang seucara lahé pih h'an meumada 'oh nan. Niet lam haté ta useuha beu beutôi punoh lillahi ta'ala. Beu keubiet-keubiet, lam seumbahyang nyoe ta ingat Poe teuh Allah nyang sidroe.

Dan beutôi. Nyan kön peukara mudah. Tapi nyan pih kön peukara susah. Seubab di Allah ta'ala brat neukalön nibak useuha dan niet geutanyoe untuk peusampurna seumbhayang.

Deungön seumpurna seumbahyang, maka amalan laén akan ji ikôt. Dan akan trôh beutôi janji Allah ta'ala. Nyang bahwa deungön seumbahyang nyang beutôi, akan teu teugah dari buet dèsya, keuji dan mungkar.

Maka h'an meleset kiban kheun Nabi, seumbahyang limöng tiang agama. Nyang peudöng seumbahyang (pubuet beu sampôrna), nakeuh ureueng peudöng agama. Dan soe nyang tinggai seureuta meukeulheuh ju seumbahyang, nyang keuh ureueng nyan, nyang jeut keue ureueng reulöh agama.

Syèdara seukalian, nyang baca Nasaja Berita. Ta ingat dônya ka toe laju-laju bak akhé. Huru-hara rata sagoe. Wabah peunyakét karap tiep nanggroe, maka seucara individu geutanyoe ban mandum, jaga seumbanyang. Pubuet seumbahyang, peubeutôi seumbahyang. InsyaAllah, deungön keuheundak Poe, dônya akirat tanyoe seulamat lam seujahtra.

Nyoe tulésan nyoe, keue pengingat droe. Deungön tujuan jeut keu peulajaran dan pengajaran untuk tanyoe umat islam bersama-sama.

Azis Azwardi,* warga Matangglumpangdua Meunasah Dayah nyang tinggai di Kutaraja.

*Aneuk kumuen Apa Raban nyang mantöng lajang.

Share this post