Khutbah Jeumeu'at: Keupu Ratéb Bak Babah, Haté Lalèe Keu Dônya
Nasaja Berita - Agama, Uroe Jeumeu'at adak beurangkapat sabé na khutubah lé khatib bak watèe jeumeu'at. Di seumijid Al Ikhlas Gampông Ilie, Ulèe Karéng, khatib bunoe geu peuingat bak jama'ah supaya bèk tuwöe untuk meuzikir, ingat keupada Allah ta'ala.
Seubab, lé khatib neupeugah, zikir nyan na keuh saboh media nyang paléng jroeh untuk ingat dan peutoe droe keupada Tuhan teuh Allah ta'ala. Tapi ingat, bah pih teuga meuratéb, seumayang hanjeut tinggai.
Hana jiduek hakikat bak ureung tan syari'at. Ta pubuet syari'at nakeuh aturan dan jalan untuk meureumpök bak hakikat. Tanda sidroe umat nabi, ikôt lagèe buet nabi.
Rasulullah sidroe hamba dan rasul nyang manyang that neuduek. Haté neuh beliau nyan han tôm tuwöe keupada Allah. Nibak babah sabé lafaz zikir. Tapi syari'at, lagèe seumayang seureuta puasa, meusikhan hana tom neutinggai. Maka nyang beutôi agama, nakeuh pubuet syari'at nyang sampoe keupada hakikat.
Jeut keu soalan, sambông khatib, kiban sit meunyo bak babah ratéb, tapi lam haté hana pré ingat keu dônya. "Bak babah laa ilaaha illallah, lam haté jéh pat komen hana lom kubalah."
Ingat, lam tingkatan amalan, na lhèe boh tingakatan ureung lam ratéb. Nyang phôn nyang keuh babah lam ratéb haté, hoe laén. Dan nyan nakeuh tahap phôn ta langkah droe meunuju Allah ta'ala. Daripada tan ratéb. Sit nuraka blôh teuh, tubôh tan keu Tuhan, até punôh piké keu dônya.
Peu lazém droe ju lam ratéb, bah pih haté hoe laén. Seubab trép bak trép, akan trôk bak maqam tanyoe bak babah ingat Allah, lam haté pih teuingat keu Allah ta'ala.
Watèe ka trôk bak tingkat keu dua, nyan tanyoe ka jroeh. Tinggai singöh Allah brie trôk bak tingkat fana. Nyang bahwa keubiet lam ta meuratéb nyan dok teuh keu Allah, sapu ta deuh lé lam pikéran. Nyang na Allah ta'ala. Hana pu laén lam donya nyoe.
Dan beu ta teupu, maqam nyan hanjeut seumbarang. Nyan ata Allah brie keu ureung nyang ka manyang, dan gléh haté. Ata nyan na, bèk neupeukabèh. Bah pih hana tom ta rasa.
Ibarat na intan lam batè. Bah pih han tom ta teumè lé geutanyoe, atawa hana lam lingkungan geutanyoe. Tapi nyang nan jih intan barang na. Na tom ureueng teumè. Nyakni ureung nyang ka ahli lam bagian intan, nyang ka dok bak mita intan, seureuta, nyang Allah brie raseuki untuk meurempök ngön intan nyan.
Nyan mantöng Apa beh, nyang na teuingat lôn dan meucatat lheuh Jeumeu'at. Seuleubèh jih le lom geupeugah. Tapi takôt salah peugah rhet keu desya.
(Azis Azwardi, Aneuk Kumuen neuh siurat teuk)
0 Response to "Khutbah Jeumeu'at: Keupu Ratéb Bak Babah, Haté Lalèe Keu Dônya"
Post a Comment