Pèng Bloe Moto, Bloe Kapai Ngön Pèng Rumoh Dhuafa Nyan Beda Anggaran

Nasaja Berita – Banda Aceh, Lam padum uroe nyoe, bahkan ka bacut leubèh sibuleun nyoe, masyarakat Aceh gabuek bak simak rencana poemerintah keuneuk bloe-meubloe.

Nyang paléng brat reulöh baroesa phôn nakeuh bhaih rencana keuneuk bloe moto barô keu dinaih-dinaih nyang na lam lingkungan poemerintah Aceh. Seubab meunurôt pikéran ureung nyan, moto barô nyan akan ék seubarô seumangat keurija awak dinaih.

Nyang bèk neucuba tanyöng sagai, pu keuh moto tuha nyan kajeut timang kilo? Kön, kön meunan. Moto awai mantöng lagak. Hai 2 atawa 3 thôn barô meungui. Nyan mulai pèng minyeuk sampoe trôk bak servih trôk u bengkè jitanggông lé neugara. Teuman köb gan mungkén brôk meugeuratan lagèe moto chevrolet angkôt anoe.

E teukeudi sit meunan, brôk, kuto, tuha, meugeuratan lagèe han ta tu'oh ban. Kakeuh awak dinaih nyang ngui moto nyan, takiraju ju hana utak. Bah pih tanggurak ubé-ubé u muda. Hai nyo hai, adak kön pih nyoe.

Seudangkan moto tuha nyan, ubé nyang ka geurencana hibah keu teungku seureuta Abu pimpinan dayah. Seubab han mungkén sit geu ék keudroe geuh mandum.

Lheuh keujadian berita nyan, nyang karap karu mansaboh Aceh (karu meupèp-pèp bak keudè kupi), ka na berita laén lom. Jipeugah bantuan rumoh dhuafa nyang padum ribèe boh nyan, hana jadèh jibangun lam thôn nyoe. Meunyo keu alasan sit han löt eumpang. Hana suah pu ta tanyöng.

Keu anggaran jih dari Baitul Mal. Baitul Mal nyan mulai dari pèng seudeukah, infaq trôk bak jakeut meusapat keunan mandum. Pu keuh jeut peusapat antara jakeut ngön infaq bahkan hareuta wakeuh (kadang) nyan neutanyöng bak gurèe. Bèk hinoe, han meuteumè surah bhah nyan.

Gara-gara nyan, ji ék darah awak baca koran, ju rap saban ngön ju ie bak dapu kupi neukiraju. Meudh'op-dh'op lheuh. That ji meubuet buet. Asai keu ureung gasien, sit nasaja bak jiputa cara.

Lheuh reuda bhaih nyan siat. Nyoe ka bhaih rencana bloe peusawat. Alèh keupu pih hom. Hai ka na MoU saré. MoU pu, pih tan meupu. Nanggroe tanyoe nyoe sit nanggroe MoU, ukuran punoh ngön MoU kiraju.

Teuman kapai teureubang nyan keu pu meunafa'at jih pih hana ta teupu lé geutanyoe. Hai han leupah ta ék. Alèh 2 droe alèh 3 droe sagai löt. Ubé kapai ata Irwandi balap-balap lam awan watè masa nyan.

Nyan na meu plôh-plôh Miliar bak rencana keu bideung nyan.

Teuman na lom nyoe bak ujông thôn, nyakni keu bhaih Persiraja Kuta Raja Banda Aceh. Klub sipak boh bhan nyang paléng meusyeuhu dari masa muda Apa jameun. Lheuh ji paréksa lé awak Jakarta, PSSI, rupajih lapangan stadion Harapan Bangsa, tan jeut ngui. Hana layak. Meunyoe Di Muthala Lampineung sit hana cerita lé.

Nyan kön ka peurlè pèng meu cak lom. Padum Miliar keunan abéh pih hom. Nyang pasti, nyan poemerintah Aceh suah suet pèng sit keunan. Meunyo han ji demo ubé na lé awak suporter Persiraja Lantak Laju. Keubiet jilantak.

Nyan pu-pu nyang kalheuh Apa calitra di ateuh nyan, sumber dana anggaran jih beda-beda. Bah pih lam APBA. Keu rumoh dhuafa nyan Baitul Mal. Ata seudeukah gob dum. Pu na rôh APBA hinan nyan hom. Hana trôk keunan info keu bhaih pèng seubab. Intelijen Pyongyang agak seuiet siangèn meunyo jak lacak bhaih pèng. Beda ngön intekijen Tiongkok.

Teuman jeut keu sualan meunoe:

"Pu keuh na pakat peubandéng-bandéng mandum rencana peuteubiet pèng lé poemerintah Aceh nyoe ngön bhaih Rumoh Dhuafa nyang jitunda keu thôn ukeu? Lagèe calitra bloe peusawat teureubang atawa moto dinaih baroesa?

Atawa soe teupu meunyo bak boh bhan dan keu Persiraja, beurangkaban jeut. Atawa laén lom. Meunyo ka tan jadèh rumoh dhuafa, kakeuh sapu ju beu bèk na ju. Malè teuh ngön ureung gasien lam nanggroe. Atawa sit keubah malè-malè ilè siat, pasoe lam siluweu kolor. Jeut sit. Beurangkaban jeut, meu awak droeneuh jaweub, di Apa meuyu kira-kira sagai. Sangkira keubiet nah."

Share this post