Tatheun Droe Teuh Nibak Maksiet Leubeh Brat Nibak Pubuet Ta'at

Nasaja Berita – Nasihat Jemeu'at, Syedara lon mandum, teuntee kasaban-saban tateupeu bahwasajih lam hudep nyoe, na dua boh peukara nyang peurlee tajaga le geutanyoe seulaku ureung nyang meuiman keu uroe page. Dua boh peukara nyan nakeuh "tarkul_manahi wa fi'luth_tha'at (tatinggai buet maksiet ngen tapubuet buet ta'at)", meunye lam bahsa Aceh "pubuet suroh peujioh teugah", meunan keuh geukheun le ureung awai (meubalek bak kheun sagai bacut.)

Nibak dua peukara nyan, nyang leubeh sulet nyan keuh nyang phon, tatinggai maksiet. Meunye peukara pubuet ta'at, mungken beurangkasoe ek. Aneuk miet pih hase jipubuet. Tapi peukara tinggai maksiet, peujioh droe nibak nyang geutham le Allah, nyoe leupah that hek bak ta jaga, cukop that jra bak ta peusiblah droe.

Meunan keuh peuneugah sideh lam kitab (Matan) Bidayatul Hidayah ata neukarang le Hujjatul Islam Imum Ghazali. Bacut keu tateupeu, kitab Bidayatul Hidayah nyan na geusyarah lom le salah sidroe Ulama Nusantara nyang that meusyeuhu nan geuh ban sigom donya; Syeh Muhammad Nawawi Al-Jawi Al-Bantani, geurasi nan kitab nyan (Syarah) Maraqil_'ubudiyah (beu neupeujroh le Allah  Arwah ureung nyan mandua, aamiin.)

Jadi lam kitab Bidayatul Hidayah nyan, seungaja le Imum Ghazali awai neukheun "tarkul_manahi" baro lheuh nyan "fi'luth_tha'at" mungken mangat get teuingat teuh. Keudali, lheuh nyan laju neukheun lom le droe neuh nyan lagee nyoe; "wa tarkul_manahi huwal asyaddu (tapeujioh droe teuh nibak buet brok, buet maksiet, leubeh that brat.)"

Memang watee taklep-klep syit hana meugese haba nyan (narit Ulama syit han meugese). Jadi meunye bak pubuet ta'at, dum soe ureung hase, hai meukeusud jih rame nyang hase, beh nyan wajeb beh ata sunat. Lagee miseu seumayang, puasa, boh jakeut, peu lom jak u haji syit meuawai-awai seutor, meuantri troh limong blaih thon sapo. Meunye umrah syit han let kupiah rap tiep uroe tuhan jibame le kapai teureubang. Meunan syit baca Quran, meuseudeukah, tabri saleum, taikot jama'ah di Meulasah, seurta meumacam bagoe laen (bagi nyang brat, teutap brat syit.)

Tapi meunye peukara theun droe nibak pubuet maksiet, nyoe piyoh-piyoh teungku, ken wayang, brat buet, meusoe-soe ek saba. Keubit brat, meuban jisah teuh le nafsu, meunan jisuhu le iblih, laju tapubuet, kadang hana tarumpok seumike, talo akai sehat, teubhet jeuneurhob, patah pageu pertahanan. Tapi hana mandum syit, bek salah. Lagee long, ureung droe neuh nyang baca, ureung baca Nasaja Beurita jroh-jroh mandum, insyaallah.

Teuma soe nyang butoi-butoi ek geu ilah daya droe geuh nibak mandum nyan? Nyang ka jeulaih sanggop theun droe nibak maksiet neupeugah le Imum Ghazali, nyan keuh ureung Shiddiqin. Shiddiqin nyan pih kiban roe meunye tapeugah, alah, lheuh tatuleh ka tan tatuoh surah. Hai jeut takheun ureung nyang katrok bak tingkat butoi-butoi teumakot keu Tuhan (meunan ju dilee, dang-dang na laen nyang leubeh timang.) Ken lagee tanyoe, meujan-jan sagai teuka yo keu Tuhan, meunyan pih kadang tok bak babah sagai. Atawa kadang syit hana meutatu'oh pih kiban yo keu tuhan. Hai beulaku atra gob atra tanyoe, kameng lam geureupoh gob kameng geutanyoe, meunye manok syit karap han tom seulamat. Peu lom lawet nyoe, moto gob bak jideng ka tan le bhan, ka abeh tapeusapat le tanyoe, meunanlah kira-kira. Eh salah, beh pane tanyoe. Awak blah deh laot nyan.

Jadi bek ilee,, gura pih di awak cue bhan moto lawet nyoe, aleh kupeu pih bhan nyan, long brat hireun nyan, peu jikeuneuk peuget keu kuweh gleung? Teujalok teuh sang dua uroe teuk bhan-bhan moto gileng jigulam, kakeuh hom, na droe jih singeh ngen ma karong.

Jadiii... Nyan nye, ho katrok bunoe? Onye hai, peukara theun droe nibak maksiet. Karap meukheun "jadi jak u sigleh", that na teuh meuka. Jadi meunan syit lom lagee watee tajak u Meulasah, talangkah u Meuseujid, nyan silop gob, bek asai ka meukeunong bak mata, ka ata tanyoe ju. Gob ijak u Meuseujid yak deunge nasehat, tanyoe jak "shopping", jak mita silop baro. Sehingga kakeuh hana sehat-sehat jeut keu ureung. Pat Meuseujid nyang tajak tanyoe, syit ka musibah ureung laen. Nyan lheuh woe nibak Meuseujid pih ladom kajeut keu saboh peukateun, duek bak warong peh tem cang panah. Peugah walakapeugah. Phon ilee hana bereh sagai khatib trep that geupeugah haba ichong mimbar, lheuh nyan ka hana can imum lambat bacut, ngen geuwirid leupah panyang. Hana bereh po pulan nyoe, hana keumah po pulen jeh, pokok jih meusidroe ureung tan bereh. Ka ini ka itu, keutek meugeutok, syit kana ju peu tapeugah, lancar lagee ie jile lam blang watee tapeuhah peuneulhah.

Nyan jeut neutak tanda, ureung meunye gadoh peugah gob hana pah, nyan ken peu laen, syit droe geuh tan pah. Hai nye, meusidroe ureung tan pah, nyang pah syit droe geuh, man peu piasan nyan. Syit tok-tok hate ka meupeunyaket.

Nyan keuh ban peukara-peukara maksiet nyang meujan le geutanyoe tuwe teuh. Padahai hek tatikui tangah watee uroe, taseumayang cula-caloe, tameurateb ukuran aneuk musabah putoh taloe, tameudoa sampe kuweut jaroe-jaroe. Tapih watee uroe tapeungeut gob rata sagoe, kheun keugob, geureutak gob, nyang ubee buet galak mita pake sabe keudroe-droe. Ladom na syit ureung na geuseumayang, na ikot pengajian lom, tapih manteng galak pajoh ata hareum. Gob ipajoh peng meugosok-gosok, itanyoe peng sogok-meusogok. Meujudi hanjeut kureung, nyan lumboi sige lumpoe ceurape tujoh neuk tapeuduek, tapeuduek atawa tapasang ikheun? Bek neusuot pih, meuri that, bucho trup inteuk.

Meunye lagee meuupat syit hana tajak peugah le. Nyan meuupat nyan hana ubat bate neuh, soe beurangkasoe, asai ka geumarit, meunye hana meuceukot keu gob bacut, hana pah keuh sang, tanyoe nyang deungo pih saboh nok, beuna sambong bacut, meuhan hana mangat asoe ju. Sep bahaya memang peunyaket nyan saboh. Meunye lam bahsa Arab "Ghibah" geukheun. Nyan ngen tageumaro kude, kurap, mangat jih lom. Peu tapeugah man nyan syit rap mandum babah teuh saban.

Na ladom ureung laen lom peukateun di gobnyan, seungap-seungap seungap-seungap, peurumoh droe kana, peurumoh gob laju geupeurhap, manteng galak jak peukaru ureung inong, galak-galak kutak sige. Nyan padahai aneuk watee dijak sikula meu keu eh bon-bon tan ngen jibloe, na'udzubillah. Han that takeujeut ceukot pih keunan, hana tatuoh bri bayangan, sabeub hana pengalaman, beubek na pih bak tanyoe. Pulang bak droe geuh Apa Raban seulaku nyang leubeh tapeutuha. Nyan idroe neuh cinta gaseh Da Mulah bek sagai neupeudua, rayek that desya tapeuluka hate ureung inong. Jiseurapa teuh le bumoe, le ubena makhluk mulai lam laot sampe lam gunong.

Beh ka, jadi nyang peurlee taneuk peugah, brat-brat tuboh bak tapubuet ibadat, leubeh that lom brat bak tapeujioh maksiet. Oleh karna nyan lam saboh Hadits Nabi Muhammad na neukheun:

المهاجر من هجر السوء والمجاهد من جاهد هواه

"ureung hijrah nyan nakeuh ureung nyang keubit-keubit ka geutinggai maksiet, dan ureung meujihad nyan nakeuh ureung nyang keubit-keubit geulawan abeh heut nafsu"

Meunan keuh kheun Nabi. Kiban seubutoi jih nyang geukheun hijeurah, meunan syit kiban nyang geukheun mujahid. Seuleubeh jih tatimang-timang keudroe teuh aju. Padum na ek gob peugah teuma.

Nyan keuh ban hai syedara. Jak saban sare tatingkatkan buet taat sireuta jroh niet, beuleubeh carong lagi gigeh bak ta peusiblah droe nibak maksiet. Babah tajaga, aurat bek le tabuka, bek sampe teuka muhop Allah ta'ala.

Geutanyoe syit mandum na tamaksiet, na desya teuh, man sagai bek sampe tuwe talakee ampon sabe nibak Po nyang that Geumaseh keu geutanyoe hamba. Nyang gura ken nyan, na syit saboh moden ureung, mandua brat di gobnyan, bak pubuet taat brat, bak peujioh droe nibak maksiet pih brat. Keu peukara taubat meu lam ulee tan, han tom teuingat. Nyan hana tatu'oh peugah le, kahabeh drat beurati, na'udzubillah beusoh-soh keudeh ya Rabbi.

Geutanyoe manusia, sabeub na nafsu, syit hawa teuh keu buet maksiet. Man Nyangkeuh beurayek saba, beuleubeh hawa teuh keu janji Allah ta'ala, dan bek sagai na syok teuh lam dada.

Allah ta'ala na neukheun:

وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَى (٤٠)فَإِنَّ الْجَنَّةَ هِيَ الْمَأْوَى (٤١)

Artijih bah lam bahsa indoneh manteng :

"Dan adapun orang-orang yang takut kepada Tuhannya dan menahan diri dari keinginan hawa nafsunya, maka sesungguhnya surgalah tempat tinggalnya. (QS. An-Nazi'at: 40-41)

Nyoe keuh bacut nasihat kali nyoe, mudah-mudahan beujeut keu pelajaran bahan seumike, beuna manfaat, keu ureung tuleh dilee phon that, meunan syit keu mandum syedara. Nyan neucok nyang nye-nye manteng, nyang pah-pah, nyang hana bereh bah meunan keudeh, bah jipajoh le majeu manteng.

Tameulakee bak Po teuh Allah, beuneupeujeut geutanyoe mandum hamba Neuh nyang sabe lam taat, sabe seumangat nibak ibadat, teuingat keu mate lam tiep-tiep saat, seurta sabe lam taubat, taubat nasuha. Aamiin!!

Teungku Muhammad Yusuf , S. Sos. I (Nyak Suh Aree). Gurè di Dayah Ummul Ayman Samalanga.

Share this post