Peu Seubab dan Hikeumah Manusia Nyoe Jeut Keu Makhluk Paleng Mulia di Donya

Nasaja Berita – Nasihat Jeumeu'at, Manusia nakeuh makhluk paleng mulia dan cukop that sempurna neupeujeut le Allah ta'ala. Hana laen peuneujeut Tuhan ateuh rhueng donya nyoe nyang leubeh jroh nibak manusia. Adak ngen malaikat pih leubeh mulia manusia. Paken tapeugah meunan, seubab firman Allah lam Qur-an meunan ka nyata.

Keu dali mulia geutanyoe manusia, na lam surat Al-Isra ayat 70:

"Sunggoh keubiet ka Kamoe peumulia aneuk-aneuk Adam (manusia)."

Meunan syit dali sempurna that geutanyoe neupeujeut le Allah ta'ala, na lam surat At-Tin ayat 4:

"Sunggoh keubiet ka Kamoe peuget manusia lam bentuk nyang cukop get."

Paki han, mulai dari ujong ok sampe ngen ujong gaki, syit ka cukop tari bentuk tuboh manusia. Sep meusaneut aju. Ulee di ateuh, gaki di miyup, pruet di keu keunepot di likot.

Beh bek ilee.. Na tom meubayang teukeudi geubalek peuneuduek nyan pakiban hi teuh kira-kira? Lagee awak meu iku jeh meuseu, awak nyan manyang atawa lambong keunepot ngen ulee, ken nyo? Atawa keunepot nyan geupeuduek di keu, watee itubiet angen kakeuh keudroe teuh ilee, na peu tahuep kiraju. Tapi alhamdulillah geutanyoe manusia hana meunan, keubit that sempurna neudesen le Allah ta'ala.

Maka meuseubab nyan mandum, that-that patot geutanyoe manusia beusabe-sabe lam ta ucap syukor keu Po teuh Allah ta'ala ateuh mandum nikmat ngen karonya..

Teutapi, bah pih ka meunan, geutanyoe bek bagah laju ta anggap droe teuh ka butoi-butoi mulia, piyoh-piyoh ilee, golom teuntee syara meutuah. Jeut takheun manteng maybe no maybe yes (tamarit inggreh sikrek, bek ipike tanyoe hanjeut).

Paken tapeugah golom teuntee? Sabeub na syit geutanyoe nyang kadang-kadang hana tathee droe, kageubi derajat mulia, meujan tapeurhet keudroe teuh. Kageubi jeut keu manusia, meujan galak beulagee awak jeh nyang meu-iku di likot meulungke dua.

Meukeusud, geuyue jak u nun, tajak u wie. Geuyue peukeu u barat, keudeh u timu taputie.. Geuyue ibadat han ta tem, gadoh takhem-khem tiep uroe tuhan. Han tatem pubuet suroh peujioh teugah hudep lam donya.

Maka oleh karena nyan, nyopat di miyup na bacut haba nasehat, teh di antara geutanyoe nyang butoi-butoi mulia, meunan syit teh manusia nyang ternyata cukop that hina, hana yum meu ubee seuma..

Meutuleh sideh lam kitab Hadits Syarah Arba'in An-Nawawi, Al-Majalisus_saniyah, kira-kira meunye tapeu-Aceh lagee nyoe:

Allah ta'ala neuciptakan makhluk lhee boh bagoe.

Bagoe nyang phon nakeuh makhluk nyang na geubi akai hana geubi syahwat (nafsu), nyan keuh para Malaikat.

Bagoe keu dua nakeuh makhluk nyang na geubi syahwat hana geubi akai, nyan keuh meulatang.

Bagoe keu lhee nakeuh makhluk nyang na geubi akai dan na geubi syahwat, nyan keuh manusia.

Maka sibeurang kasoe nyang ngon akai jih sanggop jipeutalo nafsu, nakeuh ureung nyan sajan malaikat. Dan sibeurang kasoe nyang ngon nafsu jih sanggop jipeutalo akai, nakeuh ureung nyan sajan meulatang."

Meunan meutuleh lam kitab nyang neukarang le Almarhom Syeh Ahmad bin Syeh Hijazi Al-Fasyani (beuneubri rahmat sireuta ridha nibak Allah keu mandua droe neuh nyan)

Nyan ban hai syedara lon mandum. Tamuphom disinan, berarti sidroe-droe ureung mungken saja derajat geuh (mulia) santeut ngen malaikat. Seubalekjih mungken syit saboh lumboi ngon meulatang.

Mandua deurajat nyan pulang keu akai ngen nafsu nyang ka Tuhan peusinggah nibak geutanyoe. Meunye tatem ngui akai, kateuntee talo nafsu, tapi meunye tangui nafsu, tapeuturot peu nyang kheun jih, maka na'udzubillah ceulaka tuboh asoe nuraka.

Haba lam kitab nyan sesuai ngen firman Allah lam surat Al-A'raf ayat 179.

"dan sesungguhnya Kami jadikan untuk (isi neraka Jahannam) kebanyakan dari jin dan manusia, mereka mempunyai hati, tetapi tidak dipergunakannya untuk memahami (ayat-ayat Allah) dan mereka mempunyai mata (tetapi) tidak dipergunakannya untuk melihat (tanda-tanda kekuasaan Allah), dan mereka mempunyai telinga (tetapi) tidak dipergunakannya untuk mendengar (ayat-ayat Allah). Mereka itu sebagai binatang ternak, bahkan mereka lebih sesat lagi. Mereka itulah orang-orang yang lalai."

Nyan ban terjemah jih lam bahsa indoneh. Meunan keuh seutatuih manusia, bisa saja leubeh brok leubeh hina nibak meulatang.

Paken leubeh hina, seubab, meulatang hana akai ijih, hana ngen seumike, jadi wajar hana jiseumayang, jipubuet peu nyang galak, jipajoh peu nyang heut, hana mau tau haleu hareum, hana peurlee teupeu supo atra. Asai meukaleung jitumok saja.

Meunan syit ureung nyang tem seumike, sehingga ta'at geutem ibadat, geupubuet suroh peujioh teugah, na rasa yo geuh keu Tuhan, maka leubeh mulia nibak malaikat. Dumna hayeu ta'at Malaikat? Wajar that nyan. Malaikat hana nafsu, geumeuzikir keudroe geuh. Tapi ta'at sidroe manusia, teuntee punoh ngen ujian sireuta tantangan bisikan hawa nafsu nyang harus geusaba geuilah daya.

"Geubi akai ngen seumike, geubi hate ngen meurasa", meunan kheun Hadih Maja.

Karna nyan, jak hai rakan, tangui akai, tapoh nafsu, taseumike keunasib uroe dudoe. Beh ureung tuleh, beh ureung baca. Phon ilee seumayang bek sagai tatinggai, yang katinggai laju taqadha, jakeut taboh, u tanoh suci taseutor laju meunye kana raseuki. Lidah tajaga hate tapeulara, tapeujroh taloe syedara. Bek tameu-upat bek saleng caci, bek na peunyaket benci lam rulong dada.

Tuntut ileumee keu modal ibadat, Majelis ta'lem beukayem tapeurhap, riba tapeujioh, aneuk peurumoh beuget tajaga..

Jaga jaroe jaga gaki, jaga bibi jaga mata, jaga geulinyueng jaga pruet, bek sampe ji'uet nyang ken atra. Jaga syahwat cukop that hek, cukop jai gamba cewek lam donya maya.

Ken na geupeugah, nafsu nyan tamse aneuk manyak bayi, asai hana talhah-lhah, sabe-sabe jilakeee ie susu..

Nyoe keuh bacut tulesan singkat, beuna keuh manfaat keu geutanyoe dumna.

Ya Allah, neubri kekuatan keu kamoe beusabe lam ta'at, sabe lam taubat keu Droe Neuh sampe nyawong keulua. Ngen Pang Ulee Alam Nabi Muhammad beumeusapat lam syiruga. Aamiin.

Teungku Yusuf Aree, S.Sos Guree di Dayah Ummul Ayman Samalanga

Share this post