Na Nam Boh Sunat Seugolom Jak Seumayang Sunat Uroe Raya
Nasaja Berita – Banda Aceh, Singöh ka uroe raya haji. Beutateupu uroe raya nyan bagi ureung Islam kön jak meuhura-hura. Tapi saboh uroe nyang geuyu peurayek deungön ibadat seuhingga Tuhan brie pahala nyang leupah raya.
Kön cuma jak seumayang uroe raya sagai. Jadi malam nyoe kajeut mulai grak buet ju peurayek uroe raya, beubeutôi-beutôi meuhie uroe raya.
Geupeugah lé ulama, na 6 boh amalan nyang leupah lagak ta pubuet khusuih nibak malam uroe raya sampoe seugolom tajak seumayang uroe raya singöh di lapangan atawa di seumijid.
Nyang keuphôn, meurayek su takeubi di seumijid ,meunasah atawa di umoh maséng-maséng. Bèk jak dahöh tiphi bak keudè kupi malam nyoe. Beu beda siangen malam nyoe kön hanjeut keu hai.
Nyang keu dua, singöh seugolom jak u seumijid atawa u lapangan ,manoe ilè beugléh. Bèk jak u seumijid hana manoe. Uet kalang-kalang, ukuran beumeukilat. Lam-lam idong, lam punyung, cungké beugléh. Igoe-igoe sikat.
Keulhèè, bôh minyeuk pr'et. Bah poh merek jih kön minyeuk pr'et hana meudalèh. Nyang peunténg beuwangi. Bèk lagè bè keubeu atawa bè kamèng bhok keunan lam seumijid. Putôh bulè idong gob dum. Meunyo hana kureuebeun, koh ukè, kr'öt misè, janggot-janggôt beurapi siangèn.
Keupeut, sok bajè nyang paléng lagak. Kön nyang paléng barô geuyu sôk. Tapi nyang paléng lagak. Beugléh, beusuci. Bèk na meukumat geuneuh'euk ata baroesa atawa darah sie uroe meugang hinan. Han sah seumayang.
Keulimöng, watè jak u seumijid, leubèh göt neujak ngök tapak. Keu geulantoe olahraga pih. Ubé raya pahala hai. Neuwoe lheuh seumijid seumayang uroe raya, röt jalan laén eunteuk, bèk lé röt jalan söt. Mangat meukali lipat lom pahala.
Keunam, mulai.suboh atawa fajar, neupuasa. Meukeusud jih, bèk pajoh sapu lé. Sampé neuwoe dari seumijid. Beda siangen ngön uroe raya puasa, geuyu pajôh bu bacut seugolom jak seumijid. Nyoe geutham pajôh bu. Ie han jeut sit. Kön bu mantöng.
Nyankeuh nyan nyang keuneuk Apa peugah. Seulamat meu uroe Raya, Apa lakè meu'ah lahé batén donya akhirat. Meunan sit desya dan salah Da Mulah kesayangan Apa bak ureung droeneuh pembaca setia Nasaja Berita.
0 Response to "Na Nam Boh Sunat Seugolom Jak Seumayang Sunat Uroe Raya"
Post a Comment