Gara-Gara Geumbok Lapangan Tugu, UIN Ar-Raniry Ngön Unsyiah Karap Karu
Nasaja Berita – Banda Aceh, Lam lhèè uroe nyoe aneuk mahasiswa UIN Arraniry teungöh jipeuduek OSPEK keu mahasiswa barô. Jameun OSPEK jikheun, teuman jinoe PBAK, alèh pu arti pih hom. Nyang inti jih teurimöng mahasiswa barô lé pihak kampuih, pu keuh dosen, abang leting mahasiwa atawa ureung meukat bak kantin. Seubab suah meuturie mandum nyan. Meuhan meuramah ujông. Pu lom nyang agam-agam, bèk rôh meupakat meucewek ngön kakak leting, ji teupuk lé abang leting, singèt bahô eunteuk. Nasaja kiraju.
Jadi baroe uroe Rabu (28/8) mahasiswa UIN keuneuk tôp acara PBAK nyan bak Lapangan Tugu. Meunyo pembukaan acara bak lapangan bola UIN lam komplek kampuih.
Rupajih lawét nyoe lapangan Tugu nyan ka jigembok, dan nyang mat geumbok awak Unsyiah. Padahai ubé Apa teupu nyan Lapangan Tugu nyan lhèè boh kampus poe jih, nyakni Unsyiah, UIN, STAI Tgk Chiek Pante Kulu. Dan nyan hana geukapling jatah, tapi sadum jatah ngui man lhèè boh pihak nyan.
Teuman kön ka dawa dan ka karu. Seubab hana teuhah gembok lom. Alasan hana surat idin keuh. Teuman di panitia geupeugah surat kalheuh meujok ka baroesa ka. Lheuh nyan ka calitra ureung mat aneuk gunci ka geuteubit, seubab ka cöt uroe. Meu gabuk teuk, ka dawa dawi ju hinan awak UIN ngön Satpam Unsyiah.
Di aneuk mahasiswa UIN han ék jipiké meujiphok teuh boh geumbok, sampé teuhah. Nyang jak meuhei mahasiswa di kampus, jak ju. Meusapat ubé na mahasiswa UIN nyang teungöh jeut keu panitia keunan bak Lapangan Tugu. Ukuran meureutôh droe keunan. Asai ka ramé sit ka meutamah ju karu. Teuman hana jiseumeupoh. Nyang na karap jiseumeurhom ngön seumipak sagai. Karap. Karap nyang hana lom. That na teuh, trôk keunan suah ta peujeulaih bahasa nah.
Lheuh nyan ka dawa lom sampé seuneulheuh trôh peulisi Polsek Syiah Kuala keunan jak peutenang.
Ujông calitra jadèh sit hinan bak Lapangan Tugu nyan meupeuduek acara Closing Ceremony (bah meu inggréh siangen), untuk acara PBAK atawa OSPEK nyan. Lagèè biasa, nyang buka bak uroe phôn awak peurté rektor. Nyang tôp bak uroe seuneulheuh peurté ureung rektor nyan sit.
Nasaja kiraju. Meunyo jadéh karu, ka hanjeut keubuet ju. Ék na teuh gara-gara kunci gembok, karu dua boh kampus di Aceh. Han ék ta khém kiraju nah. Nyoe berita, hana peusalah pulan pulén beh. Bèk eunteuk ka neujak peugah Apa bela awak UIN atawa bela awak Unsyiah. Nyang Apa bela tok boh haté nyang that Apa gaséh, Da Mulah.
Sumber berita nyoe dari macam bagoe. Dari Atjehwatch.com na, Mediaaceh.co na Apa baca, bak wasatha.com pih na Apa baca, dari calitra aneuk kumuen Apa nyang na rôh lam kawan nyan pih meunan jicalitra beuklam watè meuduek jép kupi.
0 Response to "Gara-Gara Geumbok Lapangan Tugu, UIN Ar-Raniry Ngön Unsyiah Karap Karu"
Post a Comment