SaPeFaM: Alhamdulillah Ka 5 Droe Santri Tabantu Biaya Jak Beut
Nasaja Berita – Bireuen, Yayasan nyang meugrak untuk bantu biaya pendidikan aneuk miet jak beut u dayah, Sapefam (Santunan Pendidikan Fakir Miskin) lam buleun Juli thôn 2019 nyoe ka geubantu sidroe teuk aneuk beut nyang meureuno di dayah.
Meunurot nyang geusampaikan lé ketua, Teungku Musliadi Abdullah lam buleun nyoe ka meutamah sidroe teuk ureung nyang teurimöng bantuan berupa santunan pendidikan.
"Alhamdulillah, deungön umu yayasan nyang golom trôh sithôn, Sapefam ka meutanggông 5 droe aneuk miet beut. Kalinyoe keu Teungku Erliadi nyang teungöh jak beut di dayah MUDI Mesra, Samalanga."
Teungku Erliadi nyan nakeuh ureung gampong Lhok Weng, kecamatan Banda Baro, Aceh Utara.
"Lheuh ta duek rapat sajan pengurus, ta tentukan tambahan sidroe penerima. Seubab lheuh ta timang-timang, beliau layak teurimöng santunan."
Lam saboh kesempatan, Teungku Musliadi geusampaikan nang bahwa ureung syik dari Teungku Erliadi, Cut Ali (67 thôn) ngön Ti Insyah (53 thôn) hana buet teutap, atawa keurija serabutan.
"Ureung syik geuh cuma buruh jak tueng upah lam blang dan lampôh gob. Meunyo na penghasilan 800ribè lam 4 buleun. Kadang geupeugöt kuwéh, meunyo na 10 atawa 20 ribè si uroe." Kheun Teungku Mus.
Lam keluarga Teungku Erliadi pih na adèk nyang teungöh jak beut di Dayah Raudhatul Ma'arif Cot Trueng, Iparli Saputri (18 thôn).
Musliadi geuharap bak rakan-rakan nyang na lam Sapefam untuk beuistiqamah lam meubantu aneuk beut. Meunan sit keu masyarakat Aceh pada umum jih.
"Meunyo tanyoe istiqamah, insya Allah bantuan berupa santunan nyoe akan meulanjôt sampoe ureung nyang ta bantu nyoe tamat geubeut lam dayah." Kheun Teungku Musliadi.
"Dan untuk jeut ta tamah lom jumlah penerima, harus deungön meutamah ureung bantu. Seubab tanyoe lam Sapefam, ta peuwajeb 10ribè rupiah lam sibuleun. Jadi ta kira ukuran, lam 50 droe ureung nyang bantu, geutanggông sidroe santri lam sibuleun. Deungön hitongan 500 ribè lam sibuleun." Kheun Tgk Musliadi Abdullah nyang meurupakan sidroe aktivis muda dari kalangan Dayah.
Seugolom jih na santri di Dayah Lueng Angen nyang ka geubantu hingga 6 buleun nyoe. Santri di dayah Paloh Gadeng dan dayah Cot Trueng na ka 4 buleun ka geuteurimöng bantuan. Dan na santri di Dayah MalikusSaleh, Panton Labu nyang teurimöng bantuan ka 4 buleun, per buleun Juli.
0 Response to "SaPeFaM: Alhamdulillah Ka 5 Droe Santri Tabantu Biaya Jak Beut"
Post a Comment