Bhaih Dana Hibah, PDA: Bek Sampe Jipeulangue Teungku Dayah Lam Kepentingan Peulitek Gob
Nasaja Berita - Banda Aceh, Bhaih dana hibah keu dayah dan seumijid sampoe inoehat hana jeulaih-jeulaih lom. Sampe na ta deungoe haba angen nyang bahwa akan troh teungku-teungku dayah untuk jak demo. Teuman sang hana nyan, tok haba angen sagai, pane mungken teungku jak demo, ka lage mahasuwa, ka kon le lagee teungku.
Teuman kon bhaih isu teungku jak demo nyang keuneuk ta peujeut keu berita kalinyoe. Tapi kiban tanggapan ureung PDA atawa Partai Daerah Aceh nyang saban sare ta teupu Partai nyan rame teungku, bahkan sit nyan teungku-teungku nyang peudong partai nyan.
Wasekjen PDA, Teungku Irfan Siddiq S.Pd.I geusampaikan nyang bahwa cara pak Plt Gubernur Nova Iriansyah nyan nakeuh saboh langkah nyang hati-hati lam peucae dana hibah. Dan PDA geuapresiasi that cara pak Nova nyan.
Lam saboh siaran Pers nyang Apa baca bak Liputan Aceh, kalinyoe hana geukirem keu Apa. Sang tuwe geuh, tapi hana jeut keu masalah.
"Gubernur Aceh, Pak Irwandi Yusuf ban mantong meuurosan ngon hukom, bhahih kasuih korupsi, jadi bek sampoe Pak Plt pih meucaruh lam keujadian nyang sama. Maka tanyoe ta apresiasi sikap gobnyan, supaya dana hibah nyoe bek sampoe jeut keu masalah teuma singoh." Kheun Tgk Irfan.
Meunurot Teungku Irfan nyang mantong muda that nyoe, teungkuteungku di dayah, teurutama that di daerah-daerah beu leubeh teliti dan jeli lam meukalon persoalan dana hibah nyoe. Teungku-teungku beu leubeh saba, supaya bek meukumat masalah ukeu teuma eunteuk.
PDA akan sabee meujaga dan kawai seugala jeuneh kepentingan dari dayah, meunan sit aspirasi dari ulama-ulama.
"Kondisi nyoe harus geumaklumi lee mandum pimnpinan dayah, suapaya daya bek jeut keu target lam masalah hukom teuman. Untuk tajaga nan dayah, tanyoe beutaikot kiban prosesnyang teungoh geupubuet le poemerintah Aceh." Kheun gobnyan.
Lam pandangan gobnyan, dayah ngon ulama dayah bek sampe jipeulangu, meunyoe lam basa Indoneh jih, bek sampe jitunggangi le kelompok laen untuk peurle droejih, atawa kepentingan peulitek gob. Geuharapkan ureung-ureung dayah beusigap dan siap bak baca alur peulitek gob lam bhaih dana hibah nyoe.
"Tanyoe dayah bek sampoe roh lam pak deungon narasi peulitek gob. PDA meuharap that pihak laen nyan bek jak peulangu dayah ngon ulama untuk jak peuphep poemerintah lam peukara dana hibah. Bek sang-sang dayah nyoe jak meugade keunan bak dana poemerintah. Nyoe marwah geutanyoe dayah, haruih tajagaa saban-saban dar kepentingan ureung laen. Bek ta lingiek tanyoe bak rapa i gob." Kheun Teungku Irfan.
Nyan sang ka meuhie cocok ngon pikeran Apa, bah pih Apa kon ulama atawa pimpinan dayah, seubab dari jameun keureu'eun dayah teudong keudroe tan na bantuan poemerintah. Dum lahee ulama, teuma bak ka jibantu le poemerintah, bek sampoe na kesan dayah jak meudahoh keunan. Nyang atoran dana hibah teutap beujalan lagee atoran. Seubab nyan ka hak dayah nyang ka meuato lam qanun. Teuman cara jih bek sampoe rhet maruah dayah dan ulama. Nyan ban kiraju.
0 Response to "Bhaih Dana Hibah, PDA: Bek Sampe Jipeulangue Teungku Dayah Lam Kepentingan Peulitek Gob"
Post a Comment