30 Droe Aneuk Sikula Meu'en Papji Bak Keude Kupi Jibeureukah Lé Peulisi
Nasaja Berita – Aceh Utara, Na buet awak Polres Aceh Utara kalinyoe bak jijak razia kafe nyang teuduek aneuk sikula bunoe beungöh (Lasa, 30/7) poh 8.
Hana kureung bak 30 droe aneuk sikula SMP ngön SMA hana jitamöng sikula.
Geupeugah lé Kasat Sabhara Polres Aceh Utara, Iptu Hendra Gunawan Tanjung patroli nyan seungaja geupeugöt untuk jaga ketertiban dan geubina aneuk sikula.
Keubiet nyo hai, adak Apa kalön le that aneuk sikula cabôt lawét nyoe, jiduek bak keude kupi nyang na wifi, laloe ngön hape, jiteumeunak abéh buet. That ji papji kiraju dum.
"Hasé patroli na 30 droe aneuk sikula SMP ngön SMA nyang ta drop wap hana jitamöng sikula, laloe ji meu'en game online pubg (papji) ngön mobile legend (mobal lejen)". Kheun Pak peulisi nyan.
Patroli mulai geupeugöt dari poh 8 beungöh, wate teungöh jeum sikula.
"Seulaen nyan na 13 boh honda nyang ta peuaman dari razia nyan" sambong Hendra Gunawan.
Geupeugah lé Pak Hendra nyan, diantara aneuk sikula nyang ka ta razia nyan, na nyang kalheuh tamöng sikula siat. Peuduek taih lam glah, lheuh nyan jicabôt, jijak duek bak keude kupi nyang meu wifi jijak meu'en game.
"Jadi awak nyoe mandum ta meuhei ureung syik jih yu jak u polsek Lhoksukon." Kheun Pak Hendra nyan.
Hukoman keu aneuk sikula nyang bateu nyan yu tinggong di keu polsek jiyu let naleung. Mangat jra jih dum.
"Ta harap bak mandum masyarakat terutama jih nyang na kafe atawa keude kupi atawa teumpat laén, supaya beu geutem teugor aneuk sikula nyang duek bak keude kupi wate jeum sikula. Nyan untuk beujroeh generasi ukeu dan beu jitem meureuno bak sikula." Meunan himbauan pak peulisi.
Nasaja kiraju aneuk sikula lawét nyoe. Abéh pèng ureung syik jih bak geupeusikula ka suah tamah ngön pèng bloe internet lom keu jimeu'en game aneuk miet. Nyang han sép pèng keu pulsa internet, jak bak keudre kupi meu wifi. Ka tamah jajan keu pèng kupi lom. Nyan golom nyang meurukok. Reulöh lheuh, that geupap jih.
Meunan Apa baca bak BERITAKINI ata jituléh lé Rizkita.
0 Response to "30 Droe Aneuk Sikula Meu'en Papji Bak Keude Kupi Jibeureukah Lé Peulisi"
Post a Comment