Khanduri Thon Atawa Haul "Ayah Ulama Aceh" Abuya Syeikh Muda Waly Al Khalidiy Keu 58
Nasaja Berita - Banda Aceh, Soe nyang hana turi Abuya Muda Waly meunyoe sinoe di Aceh nyo, suah ta tanyong keulayi, di pat geujak beut atawa pu na tom neujak beut? Nyan dum peunteng sosok sidroe Abuya Muda Waly bagi ureung Aceh teurutama keu ureung-ureung nyang na beut.
Karap mandum dayah, bek ta kheun mandum, seubab takot keubiet na nyang hana eunteuk ka sulet haba Apa, nyang meutaloe guree keudeh bak Abuya Muda Waly di Labuhan Haji, Aceh Selatan. Keu contoh ta boh Abon Aziz Samalanga, Abu Tanoh Mirah dan Abu Tumin di Blang Blahdeh. Nyan ureung nyan sit murid langsong dari Abuya Muda Waly. Jinoe nyang na tinggai Abu Tu Min Blang Blahdeh sidroe teuk dari murid langsong Abuya Muda Waly.
Bahkan salah sidroe ulama Nusantara nyang jithee malem, Teungku Haji Sirajuddin Abbas nyang tuleh buku Aqidah Ahlussunnah wal Jama'ah, 40 Masalah Agama dan buku Keagungan Mazhab Syafi'i nyang that meusyeuhu ban si gom Pulo Sumatra bahkkan Indonesia juga na geu jak beut bak Abuya Muda Waly di Labuhan Haji.
Uroe Lasa tanggai 18 uroe nyoe Haul Abuya keu 58, meunan hitongan keunira 14 Syawal Abuya neu woe bak Allah 58 thon nyang ka leupah.
Meunurot haba dari Teungku Ahmad Damanhuri seulaku cuco dari Abuya dan salah sidroe dewan guru di Dayah Darussalam Labuhan Haji nyang juga na geujak beut bak Dayah Tanoh Mirah, dan juga Dayah MUDI Mesra Samalanga, acara Haul akan geuadakan di darah rayek Darussalam.
Teungku Ahmad Damanhuri sinyak daripada Abuya Ruslan Waly, aneuk dari Abuya Muda Waly.
 |
| Abuya Muda Waly dan Aneuk Abuya |
"Acara haul baro ta mulai cot uroe, ta peuphon deungon seumayang leuho meujama'ah. Lheuh nyan baca surat Yasin dan ta baca shalawat kubra ta top deungon Shalawat Badar." Kheun Teungku nyan lagee Apa baca bak Liputan Aceh beuklam.
Teuman seulaen nyan khusus keu seluruh jama'ah tarikat sulok na pengajian, shamadiyah dan tahlil khusus keu Abuya dan tawajjoh akbar mandum.
Malam jih, malam Rabu baro baca manaqib Abuya dan tausyiah dari para alumni Dayah Darussalam Labuhan Haji.
Manaqib nyan bek hana neuteupu leubeh kureung lagee biografi. Sinan geuhimpon kisah Abuya masa udep dan do'a seureuta kalimat pujo keu Abuya seulaku guree para ulama di Aceh. Biasa jih meunan asoe manakeb/ manaqib nyan. Nyan ban kiraju.
Teuman di Apa ngon Da nyang hana troh meujak bak acara, ta lakee bak Poe deungon sikrak tulesan nyo beujeut keu bukti Apa hawa sajan Abuya Muda Waly, guree para ulama nyang na di Aceh jameun nyo, matee dan udep bahgia lam syuruga. Amin.
0 Response to " Khanduri Thon Atawa Haul "Ayah Ulama Aceh" Abuya Syeikh Muda Waly Al Khalidiy Keu 58"
Post a Comment