Boat Rombongan Intat Linto "Meuhambo" di Laot Pulo Aceh

Nasaja Berita - Banda Aceh, Salah saboh boat nyang angkot rombongan intat linto meuhambo lam laot di kawasan Pulo Aceh bunoe uroe. Nyo Apa tuleh rombongan intat linto, tapi bisa jadi rombongan intat dara baro. Seubab lam berita bak AJJN nyang ji peu-ek le Tommy meutuleh rombongan pengantin. Teuman hana meuseubot pu keuh pihak dara baro atawa linto baro. Kakeuh ta cok keusimpulan blah pihak linto ju siat beh. Meunyo kon neu peugah kon, eunteuk ta edit. Nasaja kiraju.

Jumlah ureung lam boat nyan na 30 droe. Seudangkan jumlah boat nyang angkot ureung nyan 2 boh boat. Jumlah rombongan mandum 70 droe. Keujadian jih seukitaran poh seuteungoh 12 bunoe uroe. Rombongan dari Sabang. Nyan ban mangat jeulaih, suah ta peutron boh thek thok beupaih.

Meunurot geusampaikan le Kepala Kantor SAR Banda Aceh, dua boh boat nyan ijak meuikot-ikot, teuman saboh boat meuhambo ji pok le riyeuk watee ka toe deungon pante, di arus Lampuyang, seukitaran 1 Mil. Man 30 droe meuhambo lam laot.

"Info nyang ta teurimong le tanyoe na dua boh boat nyang ji jak meuandreng, teuman saboh boat tiba-tiba meuhambo." Kheun Pak Budiono

Keu penyebab utama pakon boat nyan meuhambo hana jeut geupastikan lom le awak SAR.

"Keu seubab utama hana lom ek tapastikan, pu keuh wap ji pok le riyeuk atawa leubeh ureung lam boat, sampe meuhambo." Meunan geujeulaihkan le Pak Budiono.

Teuman man 30 droe penumpang lam boat nyan seulamat, seubab seumpat jitulong le boat nyang saboh teuk. Jinoe posisi awak nyan di Pulo Aceh teungoh preh jievakuasi.

That na teuh, bak jak intat linto abeh meuhambo ureung. Nyan keuh nyan resiko meunyo jak intat meu intat blah deh pulo. Bek neubayang keu beudak, sit ka abeh luntor mandum. Nyang ka pasti ilee hana meuteume pajoh kuwah beulangong rombongan kalinyo, keucuali geuteupu jak intat le poe rumoh keunan u bineh pante. Keu poto nyan ilustrasi sagai, seubab hana poto aseuli, kiban kondisi boat nyang ka meuhambo nyan.

Share this post