Puasa Na Lhee, Kira-Kira Puasa Geutanyoe Kalinyo Nyang Töh?

Nasaja Berita – Banda Aceh, Seulaku ureung iseulam, geutanyoe mandum man saboh donya teungoh tapubuet ibadah puasa ramadan. Alhamdulillah, hingga sa'ah nyoe geutanyoe kana bak siploh nyang keudua. Tameulakee bak Po, beu sempurna..

Puasa lam buleun ramadan nakeuh saboh amai ibadah wajeb nyang ka neupeuwajeb le Allah ta'ala keu geutanyoe seulaku umat akhe jameun, umat Nabi Muhammad saw. Mandum tanyoe tateupeu bahwasajih puasa lam buleun ramadan nyang itamong lam rukon iseulam nakeuh salah saboh cara atawa ikhtiyeu supaya geutanyoe jeut keu ureung nyang taqwa.

Ka sama-sama tateupeu syit, bahwasajih areuti puasa "tatheun droe teuh". Tatheun droe teuh hana seumajoh seurta jeb ie lam siuroe punoh mula phon suboh (watee imsak) sampoe ngen ilop matauroe atawa itamong watee meugreb.

Leubeh lengkap jih, makna puasa yaitu tatheun droe teuh nibak peukara-peukara nyang jeut keu bateu puasa. Meunan geugareh sideh lam kitab. Na syit geutamah; tatheun droe teuh nibak peu manteng nyang jeut keu bateu/gadeh pahala puasa.

Nyan ban. Sabeub ureung puasa nyoe macam moden na. Puasa na pahla pih na, ladom puasa na tapi pahala ka tan. Peureuseh lagee ureung pumpa bhan sitangen bucho meuseu nah. Tarek urat-urat sapai teusuet lidah-lidah bak geuhayon, tapi tan kreuh bhan. Beh pajan kreuh ilee bhan bucho ta pumpa. Get that roh-roh pih.. 

Meunan syit puasa, theun deuk theun grah itanyoe ngen nye watee uroe, oh tanjo uroe dudoe singoh, pahala puasa jeh pat bak pucok trieng leumiek payah tajak cok. Ho ilee, nyan meukeusud jih hana pahala. Bek neupike butoi-butoi iduek pahala bak pucok trieng. Han ek tapeuglah hiem meunye troh keunan payah tasurah. Beh pane bak trieng lom lheuh kiamat donya. Nyan haba kiasan ata geukheun le ureung tuha.

Beh ka ilee. Jadi nyang taneuk peugah, puasa nyoe hai teungku na glah ijih, lagee tajak sikula, na bagoe, na tingkatan. Na glah SD, na SMP, na SMA. Meunan meunurot peuneugah Imum Ghazali lam kitab nyang neukarang le droe neuh nyan yaitu kitab Ihya 'ulumiddin.

Meunurot haba droe neuh nyan Imum Ghazali, lhee boh bagoe puasa nyan nakeuh; puasa 'Aam, puasa Khawash, ngen puasa Khawashil_khawash (hana meuceukot SD SMP SMA lam kitab nyan, bek salah-salah muphom. Nyan ata lam ulee ureung tuleh).

Jinoe lon keuneuk pleh saboh-saboh lhee boh tingkatan puasa nyan. Meuseu na nyang kureung paih neupeubutoi. Bek sampe ka ureung tuleh ngeut, ureung baca keunong peungeut.

Puasa 'Aam

Puasa 'Aam meumakna puasa nyang rame ureung pubuet. Lafai 'Aam nyan Meunye lam basa nusya ikheun "umum, kebanyakan" meunanlah kira-kira.

Leubeh juoh jih yaitu tatheun droe teuh nibak peu manteng nyang jeut keu bateu puasa, hana taseumajoh ngen jeb ie, meunan. Adapun babah teuh, mata, geulinyueng, meunan syit jawarih tujoh nyang laen, nyan hana meurumpok theun, hana tapasang rem bak awak nyan. Mata ikalen peu nyang heut, geulinyueng ideunge peu nyang hawa. Abah ipeugah ju peu nyang galak, meusulet, ceumarot, peugah keugob, jeut keu saket hate gob, peugah haba bangai, peugah broh-broh uteun keudroe teuh.

Jawareh tujoh nyan; mata, geulinyueng, babah, pruet, dua jaroe, dua gaki, nyang keu syet kemaluan (kiban takheun lam basa tanyoe? Hom ih, neupeupaih keudroe juu).

Ladom laen lom peukateun, geupuasa na, tapi geu eh man siuroe tuhan, ukuran hana meurumpok kalen matauroe, seuseumayang ju tan. Nyan jih syit, saboh lumboi syit ngen ureung hana peulara jawareh.

Maka meunye manteng lagee nyoe cara puasa, nyoe nan jih puasa 'Aam. Nyoe keuh nyang takheun puasa aneuk manyak SD. Paken tapeugah meunan? Hai meunye bagian theun deuk ngen grah tok, aneuk manyak SD pih jeut ih. Dan bek tuwe teuh, SD nyan na glah lom ijih, glah sa, glah dua, nam boh glah mandum. Nyan tacep-cep ju keudroe teuh. Tergantung oh na juoh bak tatheun jawareh teuh.

Puasa Khawash

Puasa khawash meumakna puasa nyang geupubuet le ureung-ureung khusus, ureung meuteuntee, ureung saleh (ken lagee tanyoe saleh boh krop, hana meuri atra droe hana meukri atra gob).

Yaitu puasa ken geutheun deuk ngen grah tok. Atawa seubalek nibak puasa 'Aam bunoe. Lheuh geutheun droe hana pajoh makanan dan minuman, tamah lom geutheun jawareh geuh nibak peukara-peukara nyang jeut keu desya.

Babah hana jimeu-upat, hana ceumarot hana kheun keugob, hana peugah peu nyang hana manfaat. Kiban syit? Geumeurateb keudroe geuh, baca quran, meuzikir, meuseulaweut keu Nabi.

Mata, geulinyueng pih meunan, hana tangui bak nyang hareum nyang hana manfaat. Ata lagee tapeugah di ateuh, na ladom tanyoe, puasa puasa ju, tapi geulinyueng galak deunge nyang hana get, deunge gob meu-upat, meu-upat hana, tapi tadeunge galak. Atau cok hensed sumpai lam geulinyueng deunge musik deunge lagu, lagu pih lagu jen dum, disko lom, meu ab ub lheuh lam ulee. Ukuran ulee kajeut keu umpung jen.

Meunan syit mata gadoh kalen nyang ken-ken, peu lom lawet nyoe ka canggih, kana hape saboh sapo, kalen nyang hana manfaat keudroe teuh inan, kalen gamba ureung inong, hape macam dum na inan, troh bak hantu blawu na. Di sinyak inong lawet nyoe pih saboh piasan, ladom boh mieng ih, muka ih ka saboh muka hape meutipek inan. Peutra ikheun nyan, seunep, histori? Hana tateupeu tan dum. Ukuran teuhah babah tanyoe agam ubee plok watee roh meukalen, meujan jeut keu meusyahwat, ka desya. Tapi nyan peukateun awak blah deh gunong, hana roh tanyoe mudah-mudahan.

Nyan ho neuh, nyang meurasa na aneuk gadih, atau kadang peurumoh teuh, nyan bek lale, neuhiroe beuget peukara nyan. Beh lam donya nyata beh donya maya. Bek sampe desya tanyoe gara-gara jih, meunan syit desya gob laen nyang kalen.

Ken ka ilee nyan? Lheuh nyan jaroe, gaki, meunan syit. Tatheun syit sampe ipubuet desya. Jaroe tajaga, bek roh tacok atra gob. Nyan watee tajak mita tumon buka supot uroe, jaroe bek meugawang-gawang meuraba-raba, watee tupeh meuteu'oh hana sengaja seubab lam kawan rame.

Lheuh nyan lom, nyang galak meuwet-wet lam donya maya, bek tatuleh peu nyang heut keunan, bek peuget seutatuih kheun keu gob, atawa jeut keu syahwat gob. Atawa tasyrer, syer walakasyer dum, hana meurumpok pike jroh peu hana, peu lom bagian 'aeb gob syit that galak teuh.

Gaki, meunan syit, tatheun bek talangkah bak nyang geutham. Ho syit tajak? Bak seumayang jama'ah, jak u seumjid jak u meulasah, nyan meunan jroh. Tapi ladom na syit peukateun jak u seumjid jak mita silop uroe raya, nyan ka get teuh lom. Atra gob meu tacukeh bek hai, peu lom tacue, ngen silop nyan geutampa bak muka teuh singeh.

Na lom moden watee geujak seumayang, nyan silop gob abeh geutacah, abeh geukireuh ngat na pat peuduek silop gobnyan. Nyan ban ureung puasa, nyan hanjeut tanyoe meunan. Tapi insyaallah bak geutanyoe hana peunyaket nyan (paleng na pih sidroe dua sagai, lhee, peut, keuneulheuh buet saboh geureupoh syit).

Maka peu nyang ka tapeugah nyan beu ek tatheun mandum. Tajaga, tapeulara beuget. Peulara tuboh yoh goh binasa.

Jadi taulang sige teuk, nyang geukheun puasa Khawash yaitu seulaen tatheun grah ngen deuk, juga sanggop tatheun droe teuh, anggota tuboh teuh nibak peu nyang ka neupeuhareum le Allah ta'ala. Meunye na lagee nyan bak geutanyoe, maka insyaallah ka geukheun puasa tanyoe puasa Khawash atawa puasa SMP, ka leumah bida ngen puasa aneuk miet SD.

Khawashil-khawash

Nyoe keuh tingkatan puasa paleng hebat dan paleng brat. Hai ken brat seubutoi jih, man sabeub kadang itanyoe le that maksiet teu, jadi sang-sang jeut keubrat.

Puasa khawashil_khawash nyoe meumakna puasa nyang geupubuet le ureung-ureung khusus dari ureung-ureung khusus lom. The best of the best, meusoe-soe ureung, keubit-keubit ken seumbarang ureung. Nyaan ban. Jeut takheun puasa para Nabi dan Aulia atawa Waliyullah.

Nyan ureung nyan geupuasa, phon ilee geutheun deuk ngen grah, lheuh nyan hana geupubuet desya meubacut khong pih ngen jawareh bunoe, tamah lom sipeu teuk, hana meusideutek pih nyang tuwe geuh nibak zikir keu Allah. Ho nyang geujak pat nyang geuduek, nyan lam pikiran geuh, lam hate geuh, tok-tok ingat keu Allah. Hana peu laen. Peu nyang geukalen "deuh Allah" di ureung nyan. Nyoe keuh tingkatan puasa nyang paleng mulia.

Beda that ngen geutanyoe, hana mupat tinggai, itanyoe meujan dum lam seumayang tan tingat teuh keu Allah, ulee man saboh nyan jimeurawon watee ta seumayang, ubena nyang tuwe bunoeken tingat mandum lam seumayang. Nyan ban ukuran.

Pat syit nyang get kusyu'ek teuh? Bak nonton tiphi, nyan keuh inan, nyang inong kusyu'ek ngen sinetron, ukuran irumpok meubee gaih bak dapu. Meunan syit tanyoe agam kusyu'ek ngen awak meu'en bhan, nyang muda-muda meu'en gem, alah na goe nyan ata lawet nyoe peu ikheun nyan, gem pap, pup, lem puep, hana meutateupeu pih. 

Nyoe keuh lhee boh tingkatan puasa hai syedara. Maka cobalah syedara meutuwah, beucarong-carong bak tajaga ibadah puasa nyoe, kiban cara beu na kualitas. Ta peurasa keudroe teuh, ta muhasabah. Peutra ikheun nyan, kwikwon? Nyan, takwikwon droe teuh. Dan hana meuceh puasa, laen-laen meunan syit, leubeh-leubeh seumayang. Takwikwon keudroe teuh mandum pat nyang hana bereh, seugolom geu rilkon le malaikat singeh. Nyoe dum noe ka umu teuh, tatimang-timang ho le, ho jai, ho brat amai teuh, peu uwie peu brat unun, right or left? (aleh nye meunan pih ikheun le awak nyoe).

Maka nyan keuh meunan hai syara meutuwah. Nyang jeulaih, khusus peukara puasa, cobalah tausahakan, ka han sanggop glah lhee, paleng han beuna bak glah dua. Ka han bak SMA, beu bak SMP. Nyang bek SD le, kasep nyang ka-ka, tanyoe katuha kajeut keu yah, pane jeut sama lagee puasa aneuk manyak lom, malee teuh singeh watee sideh lam blang padang masya. Dan rugoe teuh, ceulaka tuboh teuh, geuazeub han ek tatheun tutong apui nuraka.

Ceulaka (kecelakaan) i donya kajeut lah na jasa rahardja, man meunye ceulaka uroe akhirat peu haba? Nuraka pajoh teuh. Na'udzubillah!

Maka oleh karna nyan, geutanyoe lam hudep nyoe, leubeh-leubeh lam buleun puasa, untong manteng na umu teuh bacut sapo, na kesempatan siat sapo neubri le Poe, beucarong-carong tajaga jawareh teuh, tajaga hate teuh, supaya berkelas puasa teuh, bek puasa cilet-cilet.

Sama-sama taingat dan saleng peuingat syedara, tuboh teuh, mandum nyang na sajan teuh, nyan mandum nikmat ata neubri le Allah ta'ala. Bek sampe ngen nikmat Allah nyan geutanyoe tapubuet desya.

Teungku Yusuf Aree, (Guree di Dayah Ummul Ayman, Samalanga)

Share this post