Partai NasDem "Meutimphan dan Teupingkom" Bak Pemilu Thon 2019 di Aceh
Nasaja Berita - Banda Aceh, Bek ile, meunyo Apa tuleh teupingkom keu NasDem lam thon nyo, meunan, na icaih neuh keu Apa? Meunyo icaih, tarek naphaih ilee meu lhee go troh, bek neu peulheuh-peulheuh,neutarek mantong. Eunteuk baro beu meusigo neupeulheuh man lhee, mangat teunang pikiran keulayi. Nasaja kiraju. Nyan teupingkom nyan bak Apa rasa teurjeumah nyang paleng paih keu ganto "Terpukul" lam bahsa Indoneh, ata bak Beritakini nyang geutuleh le bang Hidayat.
Seubeutoi jih kon cuma NasDem, adak PA meunan sit. Teuman NasDem bak rata lini rata tingkat teupingkom kalinyo. Mulai dari DPRK sampoe DPR-RI karap hana suara. Karap, kon hana. Baca beupaih, bek eunteuk ka neupeugah Apa jak seumulet lam berita. Kutampa neuh, neukheun keu Apa sulet. Dum Da Mulah han tom Apa peungeut, keucuali sigo-go.
Awai lam thon 2014, NasDem di tingkat DPRA na 8 boh kureusi meuteume. Ukuran teudong saboh fraksi keudroe. Beurarti kon gab. Troh bak thon nyo, 2 boh kureusi sagai. Nyan pih lagee haba itu, rap-rap han meuteume. Bak Dapil 1, saboh kureusi keu Ampon Teuku Irwan Djohan, bak Dapil 7 saboh kureusi. Nan hana Apa tusoe, aleh ka tuwo, aleh meukeuphon hana meusoe. Meunyoe Ampon Irwan meutusoe seubab seureng meubalah panton ngon Apa bak pesbuk.
Meunyo bak DPR-RI sit meusikhan tan meureumpok. Bek 'an keu kureusi, meu keu pha kureusi tan. Dum ketua Partai bang Zaini Djalil bak Dapil 1 kalinyo suah meurayek saba. Tgk. Muharuddin bak Dapil 2 nyang keutua DPRA pih meutanom. Padahai lam masa kampanye karap rata media onlen na berita gobnyan. Bak Nasaja Berita sagai nyang hana tom Apa tuleh. Keubiet hana cara NasDem kalinyo. Husaini Yusuf, caleg DPRK Aceh Rayek nyang seureng komen statuih Apa dan Nasaja Berita pih hana raseuki thon nyo. Ka teukuedi Poe lagee nyan.
Padahai bak ta kira-kira dan ta pike-pike, Ketua NasDem sideh di pusat Jakarta awak Aceh. Surya Paloh. Tapi di Aceh lam thon nyo hana cara, teupingkom NasDem, aleh pakon hom. Nyang teupu jawaban pakon nyangekuh ureung pileh, pakon han geupileh.
Seucara total suara mandum, lam thon 2014 na jumlah suara keu NasDem 168.753 neuk. troh thon nyo yuk jeut keu 131.521 neuk. Brat buet awak NasDem kalinyo 35 ribee neuk suara ka jibaplueng le hantu. Partai deungon slogan, Restorasi. Kon Resto meukat teurasi, nyan laen lom.
0 Response to "Partai NasDem "Meutimphan dan Teupingkom" Bak Pemilu Thon 2019 di Aceh"
Post a Comment