Mualem Bhaih Jeut Keu Wagub: Bah Gop Laen, Lon Han!
Nasaja Berita - Banda Aceh, Lam padum uroe nyo sit gadoh bahaih bhah soe gantoe duek keu Waki Gubernur singoh watee ka jilantik Pak Nova keu Gubernur meuseu ka jeulaih hana pat tuka tamah le kasus Bang Wandi nyang kalheuh ji peh palee le Hakim di Jakarta.
Ramee that haba nyang peugah Mualem nyang akan duek peungon Pak Nova sinan.
Meunyo pribadi Apa adak meujeut bek Mualem, bah ureung laen. Kon hana galak keu Mualem tapi meunurot Apa leubeh cocok lagee bang Fauzan Azima peugah, Kumandan Linge.
Lom pih Mualem kalheuh geupeugah watee uroe Sabtu tanggai 18/5 baroe, sideh di Nagan Raya, Aleh pu acara sideh di Nagan, Apa hana that meuteupu sit. Bak Dialeksis na jituleh, teuman hana Apa baca abeh.
Meunurot jilansit le Antara, Mualem teugaih that geujaweub, hana keupu geuh jabatan Waki Gubernur. Tapi kon meunan cara jaweub, hana gasa meunan. Meunyo gasa meunan, jadeh karu neukiraju. Nyan meuphom basa sagai meunyo haba lam gampong watee jikheun "menolak dengan tegas".
"Bah ureung laen mantong nyang hawa jeut keu wakil pak Nova sampe 2022, lon han.." Kheun Mualem bak Antara nyan.
Kiban geupeugah le Bang Fauzan Azima teuman nyang meunurot Apa cocok that. Geupeugah sikap Mualem nyan dewasa that, bijaksana, santun lam meupeulitek. Jeut keu contoh keu generasi ukeu nyang sehat akai. Ka beutoi nyan, meunyo nyang akai hana paih le, pu ta peugah teuman. Ek lam ulee jih dum.
Teuman na geu s'ah bacut le Bang Fauzan Azima, nyan awak nyang prueh-prueh haba bahwa Mualem cocok duek keu waki, nakeuh saban lagee awak nyang karat Bang Wandi, sampe meusilek kasus ngon KPK.
Adak Apa pike meunan sit. Nyan meunyo geuduek Mualem keunan, jadeh jibeureukah geuh, Hai kiban kon roh, sit nyan sidroe teuk panglima nyang mantong jideungo le eks GAM. Bang Wandi ka lam penjara. Meunyo roh jilabo Mualem sidroe teuk, ka abeh kiraju.
Seubab bagian ek moto gob diteungoh jalan nyan, hana that beutoi meunurot Apa. Nasaja ureung nyang han ek meu ikalon. Laju jilabo ek ateuh teuh.
Nyan ka tabek keulayi Apa keu panglima, Mualem atawa Muzakir Manaf.
0 Response to "Mualem Bhaih Jeut Keu Wagub: Bah Gop Laen, Lon Han!"
Post a Comment