Bhaih Tanoh Kampus, Farid Wajdi: Masa Darni Uroh Sertifikat, Hana Jipakat Prof Yusni
Nasaja Berita - Banda Aceh, Kalinyo mantan rektor UIN Ar-raniry prof. Farid Wajdi, awak Rukoh aseuli pun suah peugah haba bak media mangat jeulaih masalah teuntang karu ureung bak pesbuk bhaih tanoh kampus.
Mulai dari bhaih tembok, asrama putri UIN, sampe tanoh mushalla.
Meunurot Farid, nyan bek le karu. Bek sampe jeut keu isu nyang peukaru hubungan unsyiah dan UIN nyang ka dari jameun jeut ta meurakan. Jadi meunurot Pak Farid, harus duek nyan antara dua droe rektor, seulaku pimpinan kampus nyan.
"Adak meujeut beu jiduek rektor. Prof Syamsul RIzan ngon Prof Warul Walidin, mangat jeut geubahaih dan jeulas solusi keu masalah nyo." Kheun Pak Farid.
Teukaet masalah surat teuntang lahan asrama putri UIN, meunurot Pak Farid, UIN jeulaih that na hak bak tanoh nyan. Ateuh dasar surat-surat dari Pemda Aceh dari jameun dan juga seujarah masa teudong kampus.
bahkan geupeugah, rumoh dinaih dosen UIN atawa IAIN bak masa nyan sit memang tanoh ibah dari pemerintah Aceh. Tujuan jih ka pasti, keu mudah pendidikan. Ureung jameun hana kriet. Demi nanggroe ngon keu umat, meubacut hana geutheun.
Jadi untuk masalah sertifikat, lagee haba dari rektor Unsyiah geuyu tanyong bak rektor UIN, Pak Farid geupeugah, masa nyan Prof Darni seulaku rektor Unsyiah geujak uroh sertifikat sidroe geuh keu unsyiah. Hana meugeupakat pih rektor UIN atawa IAIN masa nyan, Prof Yusni untuk persetujuan. Sang bak Apa kira, bek takheun geulake persetujuan meugeupakat tan, hai nyan pikiran Apa, Nasaja kiraju.
bah pih meunan, Pak Farid teutap geuharap masalah nyo beu ek bereh deungon cara nyang jroeh, Musyawarah dan kekeluargaan. "Mangat na solusi, ta pakek kearifan lokal." Kheun Pak Farid. Biasa nyan lam masa kepemimpinan, na bacut sapat cumeh atawah singet.
Meunan Apa baca bak Acehsatu ata geutuleh le bang Mustakim. Seubeutoi jih ka dari tanggai 10/5 uroe Jeumeu'at baroesa ka Apa baca sinan. Teuman aleh pakon baro teuingat meutuleh keunoe. That na teuh.
Adak Apa kira meunan sit, seubab tanoh kampus nyan, atawa Kopelma Darussalam jikheun, nyan tanoh nyang geu meuweuk-weuk le ureung kaya masa nyan untuk teudong pusat pendidikan tinggi di wilayah Kutaraja atawa Banda Aceh. Unsyiah, UIN dan STAI Tgk Chiek Pantekulu. Jadi nyan lhee boh pihak nyang poe tanoh. Lagee contoh Lapangan Tugu dan Seumijid Jamik. Kon ata Unsyiah kong, atawa UIN atawa STAI khong.
Hai meunan nyang Apa teupu dari jameun masa phon Apa teupu. Seubab na tom meutanyong-tanyong bak ureung meukat eh cindoi sagoe lapangan Tugu, watee masa seureng jak wet supot ngon Da Mulah u Darussalam Biasa lah, jak peumuda droe deungon tajak kalon piasa aneuk muda ngon mahasuwa watee supot. Nasaja kiraju, abeh teuhah rahsia ngon kisah Apa seulama tuleh berita. Poto ata bak modus aceh apa cok beh, bak meumita bak gugel, leumah nyan nyang lagak.
0 Response to "Bhaih Tanoh Kampus, Farid Wajdi: Masa Darni Uroh Sertifikat, Hana Jipakat Prof Yusni"
Post a Comment