Saboh Miliyar Anggaran Moto Bupati Pidie, Ka Jianggok Le DPRK
Nasaja Berita – Sigli, Geupeugah le Pak Kepala Bagian Umum Sektakab Pidie, Pak Fazli, anggaran keu moto Pak Bupati Pidie, Roni Ahmad atawa Abu Chiek, saboh Miliyar. Nyan ka ji anggok le DPRK. Hana jikheun sapu. Pokok jih ka bereh. Tinggai geu kheun 'oe le Pak Bupati ka jadeh bloe moto baro. That na teuh.
Nyan di Dewan sinan pakön bagah that ji anggok ilee. Pu hana ji tanyöng ilee, keupu yum moto dumnan. Di minyeuk ka ji tanggong le pajak nanggroe, samoe bak tempe bhan ji tanggong. Hai ukuran adak si uroe tujoh gö ta top bhan ngön labang, han rugoe teuh. Peng tempe bhan na lam kaih daerah.
Jadi nyoe Apa tanyöng bacut, moto thon 2018 pu ka hanjeut pakek le? Di Apa Raman dikeu rumoh Apa Raban ka 17 thon ka geu ek Kijang Rover, mantöng meukilat, meuasap aspal watee geu baplung moto. Nyan dum teuga i plueng. Pu keuh moto Bupati Pidie han udep le watee ta seutater? Padahai moto Hi Ace baroesa geucok. Han geutueng moto mewah. Nyoe kalinyoe pakön ka ji ek anggaran saboh miliyar, keuneuk teumarek sewa, pu? Nasaja kiraju.
Gara-gara bagah that ji anggok le DPRK Pidie, jinoe ka ji meusue awak MaTA (Masyarakat Transparansi Aceh). Nyoe Mata nyoe ji meusue kön cuma jeut ji keumalön lagee mata tanyoe. Pak Alfian seulaku koordinator MaTA geupeugah, "Pu hana fungsi le Dewan Pidie seubagai badan pengawasan? Thon 2018 saboh Miliyar sapoe keu Bupati ngön Waki Bupati moto, thon 2019 ka lom."
Leubeh nibak nyan geupeugah le Alfian nyang bahwa meunyoe dumnan ta böh-böh peng, lagee sang ka abeh kaya-kaya dum ureung Pidie. Tiep thon Bupati ganto moto ngön peng saboh Miliyar. Pu ka geupeugöt buet dum.
Sang di Pak Dewan pih teungöh kureung paih pikiran siangen, teungöh pike jeh han sep modal lom keu bayeu saksi uroe pemilu sibuleun teuk. Spanduk pih mantöng meuutang bak awak print. Timseh rap tiep uroe jilakee kupi pree. Rukok lam siuroe abeh siploh boh slop keu timses. Ukuran wah ulee bak geupike. Kadang beh. Nyan haba kadang, dari Apa Raban. Nyoe ngön kön neujak tanyöng keudroe neuh bak awak dewan.
Nyoe berita ata Apa baca bak sinarpidie.co
0 Response to "Saboh Miliyar Anggaran Moto Bupati Pidie, Ka Jianggok Le DPRK"
Post a Comment