Ji Tamong Pancuri Lam Kanto KUA, 23 Boh Buku Nikah Ji Baplueng

Nasaja Berita – Lhokseumawe, Nyan ka gura di pancuri lawet nyoe, ji tamong lam kanto KUA di Lhokseumawe, Kecamatan Banda Sakti, ji jak ceumeucue. Sang bak hie, lheuh ji baca berita, le that korupsi lam kanto awak uroih agama, ka ji jak keurija awak pancuri lam gampong u KUA. That teuboh teuh.

Meunurot Apa baca bak AJNN, ata geutuleh le kak , geupeugah le Ketua KUA Banda Sakti, Teungku Muhammad Hasyim bunoe uroe, "Sang bak ta eu hie, uroe Sabtu 23/3 keujadian, atawa malam Aleuhad. Seubab bak uroe Aleuhad na geuhubungi le Teungku Imum gampong nyan, nyang bahwa pinto rot ka teuhan bak uroe Aleuhad."

Uroe Seulanyan bunoe 25/3 seukitaran poh 7, bak geujak tamong kanto, geukalon rupajih, abeh ji bobol pinto dum. Sampe pinto ruangan Teungku Muhammad Hasyim pih ji bobol le pancuri nyan.

Geupeugah, seulaen laptop nyang biasa ji pakek le peugawe nyang keurjia bak kanto, saboh beurangkaih pih ji phok. "Asoe jih na buku nikah 23 pasang. Mandum jiangkot le pancuri." Beurarti 23 keu dara baro, 23 keu linto baro.

Nasaja kiraju, nyoe baro Apa teupu na ureung cue buku nikah bak KUA. Pu di pancuri nyan lheuh ji meunikah, hana meureumpok buku lom. Atwa ji meukat buku nikah bak pajak Lhokseumawe. Padum yum ilee saboh. Tapi meunyoe hana teken Teungku KuaKec atawa ureung tanyoe kheun Kawaket, pane na jeut pakek ile. Pu hana troh keunan ji seumike di pancuri dum. Nan mantong pancuri, pat nyang ka ppanyang ji seumike ile. Meunyoe pancuri nyang seumike panyang, koruptor ji kheun. Nasaja.

Geupeugah le Teungku KUA nyan, ka lheuh geujak lapor bak peulisi, dan ka ji pareksa. Ka ji olah TKP. Ji pareksa sidik jari. Nyan ka meuhie peulisi, ka lagee lam phelem barat, pareksa sidik jari keudeh. Apa pke lam phelem sagai nyang na meunan.

Nasaja kiraju, macam keujadian bak tanyoe rupajih. Suah jak pareksa buku nikah Apa ile ngon Da Mulah siat teuk watee troh u rumoh. Pu mantong na lam mari, bek sampe ka ji angkot le pancuri.

Share this post