Dua Ploh Lapan Kilo Sabu-Sabu di Aceh Timu, Jikeuneuk Tulak u Panton Labu

Nasaja Berita – Aceh Timu, Leupah jahe-jahe ka ureung Aceh lawet nyoe. Ji cok sabu-sabu di luwa, ji ba u nanggroe droe. Teuman kon biet awak peurusak bansa teuh. Baroken ganja ata nanggroe ta tulak u luwa, bah mabok awak luwa, jinoe ka meubalek. Leupah carong tinggai ngeut neukiraju. Nyooe Apa peugah meunan kon beurarti jeut jak publoe ganja u Medan atawa u Jawa. Bek salah muphom. Bek troh keuan payah ta surah. Nyoe surah jih, lheuh ngeut, teu ngeut-ngeut lom. Lheuh paleh, meulapeh kiraju.

Masalah jih 3 droe nyang ji drop di Aceh Timu nyan, 2 droe awak Aceh Utara. Alahai lem pap. Jeut meunan ta kheun? Adak hanjeut pih ka Apa kheun. Di Waled Husaini Waki Bupati Aceh Raek sit geulake timbak beumatee jih awak pengedar sabu-sabu ngon ganja, seubab awak peureuloh bansa ngon agama.

Sinoe neu klik neu baca berita nyan kalheuh Apa tuleh:

Waled Husaini: Meunyoe Na Beude Lon Timbak Beumate Keudeh Awak Narkoba

Inisial 3 droe awak meukat sabu-sabu nyan FA (25), warga Aceh Utara, MJ (43) warga Aceh Utara dan AY (35) warga Aceh Timur. Meunan Apa baca bak AJNN ata geutuleh le Kak Sarina. Kop bereh Kak Sarina nyan neukira ju. Leubeh tujoh reutoh boh berita ka geupeuek.

"Nyan ban lhee awak nyan keunong tuntutan penjara siumu udep" Geupeugah le Pak Kapolres Aceh Timur, AKBP Wahyu Kuncoro, uroe Jeumeu'at (8/3). Nyoe ka Hameh tanggai 14/3 saree, Apa baro meupeuek berita. Le that khanduri lam padum uroe nyoe, hana meuteume peu ek berita. Adak teulat pih beu neutem baca beh. Nasaja kiraju.

"Nyan 28 Kg sabu-sabu nyan rencana keuneuk tulak u Panton Labu." Kheun Pak Kapolres, lheuh geupareksa awak nyan. Awak nyan ji drope le peulisi uroe Hameh nyang ka u likot tanggai 7/3. Nyoe beutoi sabu-sabu, kon lagee peulisi Sidrap, tawas ji kira sabu-sabu, lheuh ji koferensi pers bangga keudeh. Trok watee ji parseka bak laboratorium forensik awak nyan ka tawas. That teuboh teuh.

Sinoe kalheuh Apa tuleh baroe:

Lheuh Bangga Jumpa Pers, Rupajih Ka Tawas Ji Peugah Sabu-Sabu

Carong peulisi Aceh siangen ngon peulisi lae meunyoe bhah drop sabu-sabu. Pu han teuman, seubab carong that awak meukat sabu-sabu di Aceh daripada awak luwa. Hai keu bukti nyan watee ji drop, lam fiber eungkot wareuna kuneng ji sak sabu-sabu, ji ba ngon becak. Beh soe nyang ka sangka ilee. Ta pikee le tanyoe keubiet keuh eungkot suree eh ji ba. Rupajih ka eh mabok. That geu peh t'em.

Nyan bek neujak curiga ureung meukat eungkot keubiet-keubiet, ka neujak limeuh asoe fiber gob. Na can ji peusieng droe-droeneuh meusige ngon eungkot. Apa Raban han meutem tanggong jawueb beh. Nasaja berita batee neuh.

Share this post