Meuasek Ulee Tgk Yusri Puteh, Meugah That Khanduri Mulod Kota Banda Aceh

Nasaja Berita – Banda Aceh, Hana göt sagai nasib Apa baroe neukiraju. Padahai ubee raya khanduri mulod thon nyoe geupeugöt le Pemerintah Kota Banda Aceh, meuribee ureung di Lapangan Blang Padang, jak pajoh mangat.

Kön tuwö atawa hanjeut keunöng bu mulod Apa hana jak, teuman pruet hana paih sagai. Neukiraju mulai lheuh Suboh ciret sampe Asa uroe. Geuntöt ta toh, suah ganto siluweu dalam. Nasaja kiraju. Hana meupat-pat keunöng dhöt bak Da Mulah baroe. That peudeh.

Padahai ka lheuh Apa cetet bak kalender ngön gense cet aneuk miet, ka si gö Jeumeu'at ka u likot. Ka hana raseuki neukiraju.

Seubab ubee nyang Apa teupu, mulod kalinyoe, ubee na gampong nyang na di Kota Banda Aceh wajeb jak intat idang u Blang Padang. Meunan sit kanto-kanto atawa sikula. Teuman kön ek neubayang kiban meuriah acara. Dum khanduri mulod saboh gampong mantöng, na pu ta poh-poh droe teuh bak ta seumeurhoh (ta pajoh). Teuman meunyoe saboh kota, kiban hie. Nyankeuh ban.

Mulod Akbar kalinyoe keu undangan khusus ka teunte aneuk yatim nyang na di seluruh Kota Banda Aceh. Yatim hana ke Yah atawa yatim hana le Mak, yatim sit geukira, bah pih meutui seubeutoi jih nan seubot nyang beutoi. Ukuran adak raya that jabatan bak pemerintah, teutap aneuk yatim nyang utama meunyoe lam khanduri mulod. Hanjeut kön. Meunyoe kön, kakeuh kön khanduri mulod nan jih.

Nyang brie ceuramah Teungku Yusri Puteh dari Pidie. Meugah that khanduri di Banda Aceh. Ukuran meuasek ulee Teungku kalinyoe. "Meunyoe dumno, kön Pemkot nyang peugöt, tapi Pemprov." Meunan lah kira-kira haba geuh.

Nyang bek neutanyöng pu geupeugah le Teungku Yusri Puteh, Apa hana jak deungö seubab. Nyang ek Apa kira-kira ka pasti seulaen na asoe ilme ngöng hikmah, lucu han sagai meupisah ngön Teungku nyan. Ka ji thee le kaphee. Hai keudeh u Eropa kalheuh tom geujak ceuramah mulod. Bek neu pike greu Teungku geutanyoe Aceh.

Seulaen ceuramah, lagee biasa. Dikee ngön seulaweut nyan barang wajeb. Nan mantöng mulod nabi, meunyoe tan seulaweut, kön mulod geukheun. Dikee nyan sit ka lam budaya geutanyoe Aceh. Bak ta sanjong nabi dan haba peuingat keu ureung ramee lam beuntuk ca e ngön nadham.

Teuman teutap lagee haba nyan bunoe. Hana raseuki Apa kalinyoe. Kön bid'ah beh. Bek eunteuk ka na nyang jak peugah bid'ah. Nyan keu ureung peugah nyan, suah ta jok bu kulah meu saboh idang, mangat gadöh bid'ah bak babah geuh. Kuwah beulangong saboh drom, mangat bagah ji ek tensi darah. Ukuran beu bek sampe ek geu hah babah le. Nasaja kiraju. Nyan poto ata bak pesbuk Apa cok, aleh soe poe poto hom.

Share this post