Kuah Sie Kameng Aceh, Bak Mulod Nabi di Amerika

Nasaja Berita – Amerika Serikat,  Kuah Sie kameng bak Khanduri maulid nabi di Amerika meu asek ulee bulek han tom di rasa mangat lagoina Alhamdullah, ngen idin Poetallah ka seleuso acara khanduri mulod nyang geu peuget le ureung Aceh di Amerika kali nyoe.

“Bak leumah ta kalon, insya Allah meuhase lagee ban hajat”. Meunan kheun Teungku Musdar seulaku Ketuha Panitia. Sekaligus na geu bire laporan tanggung jaweub dari awai nyang di meulasah baroesa.

Acara phon geu mulai deungon seumbahyang lueho jama’ah. Lheuh nyan mandum jama’ah muslim nyang na di mesjid IPB ( India, Pakistan, Bangladesh ) ikot meu khanduri bak aula nyang na di lokasi acara mulod.

Teungku Ya'kop salah sidroe jama’ah dari Pakistan geu kheun sambilan keu pajoh kuah sie kameng, lam bahsa Inggreh, "Mangat that kuah kari nyoe. Pu nan jih, masakan nyoe Abu?" Pane na, meuhambo ju lam bahsa Inggreh, "This is not kari, this is kuah sie kameng.” Lam teuhireuen-hireuen ji anggok ju pih di Teungku Pakistan nyan. Lheuh pajoh mangat, ka ji lakee idin ju.

Ureung Aceh nyang lam panitia meupreh jame undangan laen sampe poh 2 untuk peujame ngon khanduri. Seubab poh 2 rencana ka mulai meudikee. Seubab teutap jih, lagee lagu jameun, “Wate buleun mulod tanyoe ta meudike, hana Abu tu’oh lee hai rakan ubee syedara..” That na teuh ji teumeu tuwo Abu keu lagu nyan.

Disinoe, suembahyang Leuho poh 12.30 watee Amerika atawa teungoh malam wate Aceh. Seubab beda 11 atawa 12 jeum. Nyang jak bak khanduri maulid kon Aceh nyang na di nanggroe wilayah Pennsilvania manteng. Tapi na sit ureung islam laen atawa muslim community nyang na di sekitar mesjid. Na si jama’ah Mesjid Pakistan, sampe awak kaphee non muslim di sekitar mesjid. Meunan sit undangan keu ubee na mahasiswa Indonesia nyang na di Amerika, Komunitas Indonesia di Amerika dan mandum ureung Aceh dari mandum wilayah sagoe nyang na di Amerika.

Bak acara baroe alhamdulillah mandum na trok dan cukop meuseumangat bak keurija sama, dan sama-sama meukeurja, kon lagee gotong royong, ladom duek, ladom dong, untuk peumeuhasee acara. Meunurot kheun Teuku Asri, salah sidroe ureung tuha Aceh nyang ka ta peutuha disinoe, "Meutuwah that awak gata nyang muda-muda nyoe. Memang harus beuseumangat bak peuudep budaya bangsa teuh, di nanggroe kaphee nyoe. Mangat ji turi soe endatu geutanyoe. Kon cilet-cilet."

Nyan ban neu kiraju.  Lheuh meukhanduri, nyang agam-agam ek mandum u ateuh panggong duek meudike . Nyang inong duk di miyub bak kursi ikot meudike cit mandum. Jih sit meunan, meunyoe jioh dari nanggroe, adak ka na umue meutuha si angen, meudikee sit. Meunyoe di gampong teuh, mandum suah peujok bak aneuk miet. Tanyoe muda tarek rukok toe kulah meulasah.

Lheuh nyan kabeh acara. Kamoe nyan muda-muda jak gotong royang mandum, peu bereh pingan, glah, jeh nyoe, pulan pulen. Baro meulake idin bak pengurus seumijid Pakistan, meupulang kunci, dan meuteuringgaseh that.

Maseng-maseng peu udep moto woe u rumoh droe. Karena cuaca di luwa baroe troh minus 20 derajat. Ukuran lage ta duk lam kulkas, leubeh bak nyan lom leupie. Meukhot-khot sijuek teuh.

Kakeuh kamoe harus bagah meupisah lake izin semoga kali laen meurempok keulayi. Mugreb baro trok u rumoh. Lheuh seumbahyang mugreb mandum ji poh lee sie kameng, teu adee ju ateuh kaso. Rupa jih keun bulek mantong nyang meulabo janggot ngon kuwah sie kameng. Mandum rakan, lheuh mugreb, hana udep le  hp dum. Saboh-saboh pansan ji poh lee si kameng. Beungoh uroe baro jaga. Seumbahyang isya ka teunte na. Bek neukira hana.

Abu West peu ek laporan dari Amerika Serikat

Share this post