Abu West: Lam Paleh, Na Syari'at Islam Pancong di Amerika

Nasaja Berita – Amerika Serikat, Uroe nyoe ka saboh jeumu’at hana lon jak u keude, musem salju di luwa ukuran minus 20 derajat. Bek ‘an tajak beulanja meu ta kerja manteng bron teuh. Alah pih jak keurija nyan ata wajeb.

Geutanyoe nyang ka trep hana ta teubiet, kon ka peurle bacut sapeu. Untuk ta seutel droe teuh di keu Ma aneuk miet. Bek lagee ureung tinggai lam guha, kumieh atawa misee ka lage bule mata, ceukang lintek meunan.

Seulaen nyan, ka teunte bahan pokok sandang ngon pangan si uroe-uroe pih peureule, seubab asai ka si go minggu si go sit ka meuhajat untuk belanja.

Disinoe agak beda bacut cara udep. Watee jak keurija disinoe mulai uroe Seulanyan sampe Jeumu’at. Uroe Sabtu ngon Aleuhad nyan pree bagi ureung nyang ka meukeluarga.

Biasa jih toko dan perusahan nyang peuhah uroe Sabtu ngon Minggu jipakek karyawan aneuk sikula yang umu 16 thon u ateuh, ukuran ka mahasiswa lah meunyoe bak tanyoe. Atawa sit memang mahasiswa lagee awak tanyoe, nyang teungoh kuliah S2 atawa S3 nyang keureuja Sabtu -Minggu mita raseuki leubeh di Amerika.

Watee lon teubit, lon kalon di keude that rame aneuk muda-muda meukumpoi. Phon hireuen sit, pu na, asai ka Sabtu Minggu ka ramee aneuk muda bak keudee. Akhee buet lon tanyong bak Abi Zayyan nyang ka trep meuudep di sinoe di Amerika. Beliau nyan aduen di ulon tuan nyang ka menetap di Baltimore – Amerika. "Pakon udep sabe muda-muda awak nyan Aby?". Geu jaweub lee Aby "Nyan biasa disinoe, awak nyan kana peng droe dan ka mandiri untuk meuudep keudroe, menyo untuk kuliah ka na pinjaman bak kampus. Hana le suah lake peng ureng syiek bahkan ka jeut jibantu ureng syiek." Meunan Aby Zayyan seuot teumanyong lon.

Rupajih aneuk miet nyang hudep disinoe di Amerika Serikat nanggroe si Donald Trump nyoe meunyoe umue ka 18 thon, ka ji tuntut beumandiri dan dan beu na aplikasi khusus kerja droe

hana lee meugantung bak ureung syiek. Ka wajeb keurija seureuta kleim seugala jeunieh ADM pemerintah ateuh nan pribadi. Hana meu urusan le ngon ureung syiek. Bah pih ladom mantong ji tinggai sajan bak rumoh ureung syiek. Nyang pasti nyang muda nyoe ka jibantu ureung syiek dalam hai beaya udep. Karena peraturan disinoe macam bagoe dum. Na berupa bill atawa kredit rumoh sampe trok bak eistrek, ie pam, iuran broeh, internet, moto, mandum suah bayeu. Seubab sistem meubloe disinoe nakeuh kredit jangka panyang. Meunyoe ureung nyang le sen atawa kaya ijo nyang bloe barang dan fasilitaih seucara kontan ji teume keunong pajak kerja ngon pajak harta, pih that jra teuh bak ta bayeu. Ukuran ji teume reuloh boh thek thok teuh.

Dari aturan pemerintah nyang ka nyata ta kalon nyoe, meuhie lagee na adopsi hukom Syariat Islam siangen. Seubab lam hukom syari’at geutanyoe, bila aneuk mit ka baleg, nyan hana lee tanggung jaweub ureung syiek, mandum ka wajeb ji tanggong keudroe, maseng bermaseng.

Seulaen nyan na sit nyang that ta sayang disinoe. Hana sep didikan agama di rumoh. Seubab mulai lheuh suboh na ju moto bus jak jemput aneuk miet jak sikula. Eunteuk keudeh supot lheuh asa baro di intat woe u rumoh lom. Nyan seulama 9 thon. Dan pih ureung syiek awak nyan sibok ngon keurija. Jadi hana watee untuk ji pham agama.

Teuman boh kiban hie watee ka mulai kuliah ka tinggai si droe, hana le sajan ureung chiek. Kadang roh tinggai ngon rakan nyang hana bereh. Miseujih saja awak pergaulan bebas, bahkan wap han seip ilme agama ujong jih jeut keu atheis. Peu keuh nyan aneuk ureung islam atawa sit memang dari non-muslim dari phon ken. Seubab ka meutamah rame that ka generasi milenial disinoe nyang jeut keu ateis, ureung hana agama, awak han pateh na tuhan. Nyang that ta sayang aneuk ureung Islam pih lagee nyan kejadian.

Meunyoe ta kaji lam hai nyoe, memang hana mandum cit generasi milenial jet keu ateis. Seubab bagi keluarga ureung islam nyang ta’at, na sit nyang peu sikula aneuk geuh bak sikula agama islam.

Disinoe na sit sikula agama islam bahpih jioh dari tempat tinggai. Na sit nyang sikula model lagee dayah bak tanyoe. Jadi nyang suah duk di sikula model dayah meunan, han geu peulheuh aneuk geuh tinggai keudroe meunan. Kecuali meunyoe ka lheuh meukeluarga. Nyan ban cara ureung nyang kong agama. Karap seugitu sahoe ngon bak tanyoe di Aceh sit.

Nyan keuh ban kisah tanggongjaweub ureung syiek sinoe di Amerika. Meunyoe ta terapkan di Aceh untuk bhaih peureunoe mita peng watee umue ka baleg, maka hana lee keujadia lagee kheun Pak Bupati Bireuen, “Pakek bajee dinih, Meucewek mantonglakee peng bak mak”. Nasaja kiraju.

Abu West, Ureung geutanyoe Aceh nyang ka geu meuudep di Amerika.

Share this post