Abu Razak Jok Atribut Kampanye Jokowi-Amin Bak Waled Nu
Nasaja Berita – Banda Aceh, Abu Razak seulaku ketua Sekber (Sektretariat Bersama) Jokowi-Ma'ruf Amin di Aceh bunoe uroe geupeujok bajee kaos seucara simbolis bak Ulama Kharismatik Aceh, sekaligus pimpinan Dayah Ummul Ayman Waled Nuruzzahri atawa Waled Nu.
Waled Nu memang ka na meupadum gö tampil bak acara-acara relawan atau tim kampanye Jokowi. Salah saboh jih baroesa di Langsa. Meunyoe hana salah PKPA nan jih, Apa pih ka tuwö. Nyang inti jih persatuan Kiyai meunyoe di Aceh Teungku ta seubot.
Waled Nu meunurot inpho nyang troh bak Apa, memang to that ngön Kiyai Ma'ruf Amin seulaku Cawapres lumboi 1. Calon Wakil Presiden dari Jokowi. Waled dan Kiyai Ma'ruf saban-saban bak Nahdhatul Ulama. Pu lom Waled jabatan Ketua Syuriah NU Aceh, seudangkan Kiyai Ma'ruf ketua Syuriah NU Pusat. Meunyo salah nan jabatan, beurarti salah inpho nyang troh bak Apa Raban. Neu maklum mantöng si gö-gö salah. Nasaja kiraju.
Inpho laen nyang Apa teumeung dari Samalanga, nyang bahwa Waled tom geuseubot "Nyan Kiyai Ma'ruf nyan ureung chiek geutanyoe, ureung malem, ureung caröng. Pantas that ta dukong. Jelaih that kiban beliau nyan. Nyang peubrok-peubrok beliau nyan haba hoax mandum." Watee nyan Waled neukheun kön hoax, tapi huek. Lagee huek meukumat tuleung eungköt lam reukueng.
Abu Razak bunoe uroe teukeujöt geuh bak troh Waled Nu bak Sekber di gampong Ilie, Jalan Prof. Ali Hasyimi. Meunyo dari Simpang BPKP, jalan tumboh u Pango. Teukeujöt seunang meunurot geupeugah. Kön teukeujöt lagee ureung teukeupak arwah beh. Bek salah meuphom eunteuk.
"Waled nyoe ureung chiek geutanyoe, dan seukaligus Ulama rayek di Aceh. Seunang that tanyoe meunyoe Waled ka sajan geutanyoe. Pu lom Pilpres hana trep le, sibuleun lewat siangeun teuk sagai." Nyan ban haba Abu Razak kira-kira meunyoe ta meuphom lam bahsa Aceh geutanyoe.
Nyoe berita Apa baca bak Klikkabar nyang jujur mengabarkan ata geutuleh le bang Zulkarnaini.
0 Response to "Abu Razak Jok Atribut Kampanye Jokowi-Amin Bak Waled Nu"
Post a Comment