Abi Anwar Kuta Krueng: Masa Jokowi Get That Geupeureumeun Dayah
Nasaja Berita – Banda Aceh, Abi Anwar aneuk daripada sidroe ulama nyang ka ji thee malem dan meutasawoh, Abu Usman Kuta Krueng uroe Aleuhadtanggai 17/2 baroesa na geujak bak acara awak Jokowi. Acara awak relawan Jokowi. Nan relawan baro nyoe KAJAK, Komunitas Jokowi Amin Kuat. Nyan watee ka neubaca kajak, bek le neusambong kajak pu, han ek ta peuteupat h'iem ngon ureung tanyoe Aceh seubab nah, aleh hoe-hoe dum geu pleu surah. Nasaja kiraju. Apa hana roh meujak seubab na khanduri Mulod. Jadi nyoe Apa rawi berita nyoe bak Klikkabar.com, ata geutuleh le Teungku Muhammad Fadhil.
Geupeugah le Abi Anwar, "Masa Pak Jokowi-JK seulama nyoe, le that maslahah keu dayah-dayah atawwa pesantren. Program keu dayah dan perhatian keu dayah leubeh masa Pak Jokowi daripada masa seugolom jih". Nyan hana ta tu'oh bantah le geutanyoe, seubab Apa hana lam dayah, nyang rasa nyangkeuh ureung dayah, jadi tok ureung dayah nyang jeut komen keu bhah meunan. Asai bek sampe dawa dan karu sabe-sabe dayah sagai, nyan peunutoh bak Apa. Meunyoe sabe dayah ka karu ka dawa, rakan Apa nyang bak keude kupi sit ka jeut meurhom-rhom glah neukiraju.
Seulaen bak nyan, Abi Anwar peugah, Jokowi nyoe adak leumoh-leumoh,tapi teuga ureung jih. Keu bukti, dumnan ji teunak, aleh pu-pu ji fitnah, amntong seulow, geukhem lom. Hana meubeungeh geuh pih. Nyan salah saboh sifeut dan ciri pemimpin nyang jroeh. Meunan lah bahsa nyang Apa meuphom, dari haba Abi nyang ji tuleh bak Klikkabar nyan, meunyoe han neu pateh, neu klik SINOE neuk baca keudroe neuh lam bahsa Indoneh. Jujur Mengabarkan, nyan slogan klikkabar. Nyoe poto pih ata klikkabar, meunyoe hana geupeuidin, kakeuh suah meureumpok jak bayeu kupi keu Tgk Jurnalieh nyan sang singoh uroe.
Bak acara KAJAK nyan baroesa, na undangan keu aneuk yatim dan aneuk dayah seluruh Aceh. Ka hana mandum, na nyang meuwakili ka meumada. Acara bak geudong serba guna, stadion Harapan Bangsa, Lhong Raya. Lam acara na Bang Yan, Sofyan Dawod. Meunurot info sang Bang Yan ketua KAJAK nyan. Teuman bah Apa peuteunte ile beupaih, aleh nyoe aleh kon. Meunyoe kon, kakeuh salah Apa, meunyoe beutoi, kakeuh beutoi inpho nyang troh bak Apa. Nasaja kiraju.
0 Response to "Abi Anwar Kuta Krueng: Masa Jokowi Get That Geupeureumeun Dayah"
Post a Comment