Pak Amin Kareuloih: Soe Beh Broeh Bak Jalan, Denda Siploh Juta

Nasaja Berita – Banda Aceh, Pemerintah Kota Banda Aceh ka reman lawet nyoe neukira ju. DLHK3 atawa Dinas Lingkungan Hidup, Kebersihan dan Keindahan Kota. Hop ile, pakön panyang that singkatan pih Dinaih nyan. Baroekön sang mudah lagoe ta kheun awak dinaih kebersihan. Alah kakeuh meunan ju. Pokok jih nyan sit, ek nok, ek manok, ek canok saboh sit nyan.

Hoe-hoe ka ji ruwe teungöh ta tuleh berita kiraju. Jadi dinaih nyan ka jiseuba surat edaran nyang bahwa soe beurangkasoe nyang beh broeih bak jalan, suah bayeu keu pemkot siploh juta. Meunyoe han ek bayeu kakeuh lop lam peunjara sibuleun. Meunyoe lam peunjara, hana teubiet peng. Malah pree bu lom lhee gö si uroe. Ka laba, hana jadeh rugoe.

Nyan nyang biasa beh kulet boh limoe atawa plok aqua bak jalan, peuleuheun. Biasa akai ureung ek moto nyan, peuhah jindela, geurhom plok aqua. Awai Apa na tom keunöng watee ureung rhom meunan, moto dinaih geu ek neukira ju. Apa balap Apa let moto nyan, thok-thok jendela moto. Ka rao jadeh Apa seurapa geuh. Teuman bak Apa kalön aneuk miet geuh lam moto, kakeuh hana jadeh, Apa peugah get-get, geu lakee meu'ah.

Nyankeuh nyan ureung lawet nyoe, ek moto abeh gaya. Peng punoh keih kadang. Teuman sayang, utak han sep nutrisi kadang watee ubiet. Bagah that geu jep susu leumoe. Jadi meu leumoe si angen akai. Bah pih meu leumoe pih hana akai meunan. Sit tan akai leumoe.

Teuman ramee sit ureung nyang kureung galak keu aturan nyan. Seubab meuhai that denda, siploh juta. Gaji geukeurija sijuta seuteungöh dum si buleun. Nyan pih lhee buleun si gö jibayeu. Jadi meunurot gobnyan seulaku warga Banda Aceh, han ji tamöng akai.

Na siet nyang dukong. Geupeugah le beliau nyan denda sit beu brat, meunyoe denda siploh ribee, han meu ji peu p'ee pih. Siploh ribee meusaboh bungkoh rukok han meureumpök. Teuman syarat jih pemkot beu ji seudia tong broh rata sagoe. Meuhan rog ta böh lom bak jalan atawa bak bineh jalan.

Berita Apa cok bak beritakini.co, Apa tuleh keudroe laen. Meunyoe awak nyoe ladom sit ji kupi paihe ju ubee na. Apa hanjeut meunan. Beu meupep-pep sit , baro paih. Meuhan rugoe a duek bak keude kupi dari masa ji lakee KTP jameun masa DOM sampe KTP mirah puteh. Abeh haba ek a rawi, nyoe ta rawi keunoe lam nasajaberita.com

Apa Raban keudroe seutuju that neukira ju. Denda sit beu meuhai jih. Lagee lam phelem india nyang Apa nonton malam baroesa, aleh pu judul jih ka tuwe, meupeulitek meunan phelem, sang meunyoe hana salah judul jih Bharat Ane Nenu, phelem na ji bahaih dana gampong untuk peumaju daerah. Dan ji denda awak kih lampu mirah, sadum ngön yum honda kiraju. Sinan bak judul neu klik ju, menyoe hawa keuneuk nonton phelem.

Nyan Pak Amin kajeut peulaku meunan. Asai beu sama rata watee keunong. Bek sampe keujadian, rakyat jeulata keunöng denda, meunyoe awak ek moto dinaih, ka meumada ngön sikhlah glah sanger. Mandum bereh buet. Han ek ta khem.

Share this post