Teungku Mudas: Tes Beut Capres Bak Tanggai Limong Blah Buleun Sa

Nasaja Berita – Banda Aceh, Gara-gara karu bhah soe paleng Islam, IKADAH, Ikatan Da'i Aceh peugöt tes beut keu Capres-Cawapres Indonesia. Bah pih hana meuurusan ngön KPU, tapi nyoe peurle that, seubab untuk peubereh, peuleumah soe nyang meuphom agama. Paleng dasar jih ya baca qureuan.

Surat undangan, mandua ka ta kirem. Nyoe nyang lucu jih uroe nyoe awak lumboi sa hana deuh, awak lumboi dua pih tan leumah. Kakeuh kiban ta peugöt teuman.

Acara tes beut, rencana thon ukeu. Trep mantöng rupajih, si thon teuk, 2019. Hai adak tanggai Sa Januari kön thon ukeu sit nan jih. Jadi rencana tanggai Limong blah buleun Sa, (15 Januari 2019) di Seumijid Raya Baiturrahman Banda Aceh. Nyang akan ta tes baca surat patihah ngen surat pilihan juz 'amma. Beurangkapu hasil jih eunteuk, hana urusan ngön KPU. Bek na roh nyang pike, meunyoe hanjeut beut hana jadeh atawa ji ceu nan le KPU.

Sinoe neu klik neu baca, pakon haruih ta tes beut

Panitia tes eunteuk dari ulama Aceh. Juri mandum ureung Indonesia, hana geujak boh nilai le ulama, kecuali ka na nyang lake. Hana peugah si A hanjeut beut, si B han jeut beut. Mandum nonton, deungo keudroe. Ubee na tv ta undang ta yu liput, live neukira ju. Jadi hana pat peugah nyoe jeh le.

Ta harap, bah pih mandua perwakilan tim hana ji jak, undangan nyoe troh keudeh u pusat. U pusat geupeugah le Tgk Mudas. Ken u ateuh pusat atawa u yup pusat beh. That teubeh teuh neukira ju awak tanyoe nah. Seubab asai ka ta peugah pusat, pikiran nyangkeuh hinan-hinan ju. Teuman ken han jeut keubuet.

Geupeugah lom le Teungku Mudas atawa Teungku Marsyuddin Ishak, ka seip ta kalon ureung meupake meureupah islam. Nyan hana rehm dum, hoax tan geuturi, tabayun hana geu tu'oh. Pu lom baroesa rakan kamoe, sesama Teungku, kajeut keu korban jak share-share video hoax. Kop weuh teuh.

Sinoe neu klik neu baca berita share berita hoax, ji drop le polda Aceh

Lam pantauan kamoe, kheun Teungku Mudas, nyan seubab ka ji kap lam ulee, bahwa pilpres kalinyoe ken le bhah visi misi, untuk bangun nanggroe Indoneh, tapi peuleumah droe soe leubeh Islam. Nyang laen ken Islam, ka ken kaphee ka keuh munaphek. Pokok jih meunan-meunanlah, leubeh kureung haba Teungku Mudas bunoe.

Maka dari nyan keuh, suah ta tes ile, pu jeut beut. Ken keu pu-pu, tapi mangat leumah pu beutoi meuislam, bek nyang na karu ureung meu'en pesbuk dum. The-the eunteuk meu patihah hana leumpok. Nyoe ken haba Tgk Mudas, tapi haba Apa Raban. That phak kira ju, lam tuleh berita, culok nan droe. Hana web berita laen seulaen nasajaberita nyang model teumuleh meunoe. Wate geu meurawi, lee peugah droe daripada asoe. Tapi, nyoe na tapi, kha raya panyang tapi, meubrewok lom neukira ju, hoax hana meubacut. Keucuali hana neutu'oh  meuphom kiban gaya Apa Aceh bak peugah haba lam keude kupi. Hai ukuran nah, pisang lam minet geupula, lam minet jeut koh mue, meu'oh rasa-rasa lom. Nyan haba ateuh meja keude kupi. Sampe-sampe tuwe bayeu kiraju. That geu soh min dih.

Oiya hai ka tuwe, keu poin asoe surat eunteuk Apa Raban mita ilee beh. Hana troh keunan lom info. bah tajak kalon bak web berita gob ile. Na syara nyang ka teupu, neu kirem bak pesbuk Apa Raban ju, mangat ta olah supot eunteuk. Nyoe Apa jak isteriberahat ile siat, uroe suum, ban lheuh sie kameng satnyoe. meu geudh'et mangat, meut'eung-t'eung lam ulee. Cocoklah keu malam minggu eunteuk.

Sumber poto ata di share le awak nyoe bak pesbuk.

Share this post