Prabowo: Jameun, Kuneuk Poh Muallem, Muallem Keuneuk Poh Lon

Nasaja Berita – Banda Aceh, Prabowo Subianto watee jak baroe u Banda Aceh bak acara peringatan peut blah (14) thon tsunami Aceh, di Lampulo, seumpat geu calitra, nyang bahwa jameun tom meu let-let ngön Muallem. Kön meulet-let lagee aneuk muda bak jalan raya, atawa aneuk miet meu'en. Tapi ji let lam uteun ngön lam kuta, jak mita poh mate. Timbak bak ulee atawa bak dada, meuhan drop koh taku.

Hai nyan meuphom haba Apa Raban, meunan lah kira-kira meuphom basa. Han neu pateh Apa peugah, ci neu jak tanyöng-tanyöng bak ureung tuha di gampong neuh, nyang tom jak cok mayet lam blang atawa lam krueng. Na nyang hana ulee, na nyang ka soh asoe dada. Meunyoe na ta meuudep masa konflik dile ka meu'oh ju meukeusud. Nyang inti jih Muallem buron Indoneh masa nyan, Prabowo ji buron le awak GAM.

Calitra nyoe, calitra jameun. Seubab Prabowo watee nyan Danjen Kopasus. Teuman jinoe hana le, ka dipecat le neugara Indoneh. Aleh pu seubab dan pakön ji pecat nyan hom. Hana troh info lom keu Apa. Nyang pasti kalinyoe geu calon droe lom keu Presiden neugara Indoneh. Watee 2014 kalheuh tom ek keu calon, meutimphan talo ngön Jokowi. 2009 ek keu calon waki Megawati, meuhambo sit taloe ngen Pak Susilo. Kalinyoe geu meuabeh, bak hie. Awak teuntra teuman, beh pane na jak piyoh. Beda siangen ngön teuntra Aceh, bek ta peugah beda that, ji sak teuh lam eumpang, yatim aneuk miet di rumoh, na can balee Da Mulah teuh, di leumpah lagak mantöng boh hatee Da Mulah teuh. Alah ma beh. Nasaja neukira ju, aleh hoe-hoe ji ruwe berita watee ta tuleh.

Meunurot haba Prabowo, han ji tamöng akai kiban cara Pangkostrad ngön Panglima GAM nyang jameun meuprang, bah pih kön jameun that, jinoe ka meu wa-wa, meu um-um, kajeut keu sahabat. Lagee hana keujadian sapu.

Apa Raban cukop that seutuju neu kira ju. Meu saboh huruh hana Apa bantah. Sit han ji tamöng akai. Jameun kiban, jinoe kiban, nyan rakyat keunöng tapak, that simban-simban. Watee ta tuleh nyoe, sang lagee mantöng meurasa kloe meunan, meu 'ie-'ie lam punyueng teuh wap ji tampa. Nyan bek ile ta calitra nyang hana meupat jrat, leubeh barang. Masa DOM beh, kön DM. Beda masa nyan. DOM masa Nek To, DM masa Mega.

Teuman meunyoe neu tanyöng thon padum Prabowo jeut keu Pangkostrad dan pu thon Muallem jeut keu Panglima, han ek Apa jaweub sinoe. Bah geu jaweub le ureung nyoe laen. Nyan ka pasti ile. Nyan haba Prabowo baroe di Lampulo. Nasaja neukira ju.

Keu sumber berita meunyoe han neupateh haba Apa, neu mita keudroeneuh bak gugel. Kanal aceh na, kabaraceh na, dumpat na. Bek peugah hana sumber. Si gö-gö beuö Apa tuleh sumber kön hana pu. Asai sumber na.

Share this post