Beukah Jai Peng. Tujohblah Te Keu Dana Thon Baro Awak DPRA Ngön Pemerintah Aceh

Nasaja Berita – Banda Aceh, Kop can neukira ju malam thon baro awak Dewan Aceh ngön Pemerintah Aceh. Tujohblah T kalinyoe. Hana cilet-cilet. Malam thon baro, ka peng tamöng lom di awak dewan. Di Apa abeh minyeuk honda bak jak peuwet Da Mulah ngön sinyak malam thon baro beuklam. Niet keuneuk jak kalön awak töt marcon. Nyang na meureumpök awak töt broeh di keu kanto Satpol PP. That reulöh kiraju. Pangkai teuh abeh, hiburan tan ta teume. Kakeuh hai.

Di awak dewan ngön pemerintah, malam thon baro meukachuk ji keurija peutrön boh thek-thok. Kalinyoe ek ta keumira. Adak le meutuleh kiraju lam berita, sit ka neuduek kiraju. Ukuran meunyoe reulöh kolotor, kira-kira campli bak keude, suah teugön kolotor bak HP. Meu Te Te peng. Han ek ta bayang. Ukuran meunyoe ta bloe eh bon-bon jeut direue mulai dari Simpang Limöng sampe Simpang Mesra, han löt jalan. Sang u Darussalam troh.

Tapi bek neupike nyan keu bloe eh bon-bon beh. Nyan peng anggaran untuk bangun Aceh seulama thon 2019. Mulai peugöt jalan reulöh sampe boh minyeuk moto awak dewan sinan peng. Laen-laen pat ta teupu di geutanyoe. Ta tanyöng han ta tupat tanyöng, kakeuh ta peugah ubee ta teupu mantöng. Nyang hana ta teupu bek ta peugah. Nyan ban kiraju. Kiban na bereh Apa kön, seip jujur dan lagee na ju Apa peugah.

Kajeut jak ikot tender ju nyan awak kontraktor. That jai proyek ji lelang lam thon nyoe. Asai na neuhambo ju. Bek neupike ubiet rayek keu proyek. Proyek pula bak janeng pih jeut. Keu seutok eumpeun taku (peunajoh), lagee haba Apa Karia jameun. Meuhan proyek tuleh-tuleh statuih pesbuk kadang na sit bak thon nyoe. Program ngön proyek kön macam dum. Jak tanyöng ju nyan. Bek le neupeusingöh. Uroe nyoe adak tanggai mirah neubalap ju. Ka hana meureumpök ngön awak kanto. Ngön satpam kajeut sit ilee. Dang-dang meureumpök ngön awak i dalam.

Sinoe neu klik neu baca ata kalheuh Apa tuleh baroesa

Beuklam Apa kalön statuih pesbuk Teuku Ampon Irwan Johan. Han ek Apa bayang neukira ju. Memang nah, bak ka na rapat sidang paripurna, ka han meuteume jak u Midan awak dewan tanyoe, jak meuthon baro kalinyoe. Seip bereh. Teuman laba sit awak dewan, na rapat ka peng tamöng lom. Hai nyan ata keubiet 'oe. Sit ka meunan. Pu rapat lam meulasah, hana tamöng peng keu ureung gampong. Meumada kupi sikhan glok, pisang gureng siblah sapoe. Nyoe dewan böh panee ile. Kön nyoe ile? Meuhan böh pane meuseunoh-seunoh ureung ek keu dewan, adak pangkai ijazah Paket C pih geu rhak keunan.

Sinoe neu klik, caleg Aceh that jai ijazah Paket C

Nyankeuh meunan nyang Apa keuneuk peugah. Kop bereh dewan tanyoe. Adak meunan tiep malam ji tem jak rapat han rugo minyeuk moto jiboh ngön peng rakyat neukira ju. Nyoe meunyoe na model ganto plat, ji jak u laot ngön aneuk cuco jih, nyan nyang ka han ek talieh. Di geutanyoe rakyat, bek 'an keu moto, meu keu minyeuk hana soe tanggong. That geup'up daih.

Tapi Ampon Irwan sang hana meunan. Get akai, geutem balah komen pesbuk, pu nyang na geu apdet bak statuih. Asai na peng tamöng atawa peng teubiet na geutuleh. Ka hana abeh that geutuleh, na keuh meubacut. Han mungken sit geujak tuleh mandum keunan. Han ek geupeuna batre kolotor kiraju bak geu kira peng tamöng ngön peng teubie.

Nyoe Apa pujo bacut gobnyan, seubab geutem add Apa Raban bak pesbuk baroe. Ka mangat ta lake dana aspirasi sang kalinyoe. Nyang baca nyoe, bek lakee weuk bak Apa beh. Apa keuneuk peuseunang Da Mulah rencana. Keuneuk bloe baje baro meu dua boh seutel. Lheuh ba peuneuwo jameun, meu sikhan ija batek hana tom Apa bloe le. That peudeh kiraju.

Share this post