Meutuwah That Aneuk Muda Karang Taruna Repansa Donor Darah

Nasaja Berita – Bireuen, That trep ka hana ta deungö bhah karang taruna di Aceh nyoe. Rupajih na mantöng meupadum pat teuk, lagee di Matang Glumpang Dua Meunasah Dayah, nan Karang Taruna awak nyoe, Repansa, Remaja Harapan Bangsa. Bereh that kira ju. Lagee nan stadion Harapan Bangsa. Peujeut keuh keu harapan bansa Aceh, bansa Indonesia.

Acara donor darah le awak karang taruna repansa kajeut keu kegiatan tiep thon. Thon nyang kalheuh na sit. Kalinyoe awak Repansa kerjasama lom ngön UTD (Unit Transfusi Darah) RSU Fauziah Bireuen. Leubeh kureung baroe uroe hameh na meureumpök meu 46 boh kantong plastik darah. Kantong darah hana saban ngön kantong plastik ta bloe eungköt beh. Bek neu kira lagee kantong plastik. That na teuh.

Geupeugah le ketua karang taruna nyan, Bang Norwein Faisal atawa meunyoe awak nyoe hei Wak Sal, acara donor darah nyoe meusaboh paket ngön acara mulod di gampong. Seubab di gampong Meunasah Dayah, mulod kön cuma pajoh khanduri. Tapi na keugiatan laen sit, lagee donor darah nyoe. Meunan kheun Wak Sal, nyang kalinyoe ek keu caleg röt parte bak EsBeYe, parte Demokrat, aleh lumboi padum, hana Apa Raban teudum.

Bek neupike awak Bireuen lagee aneuk sikula nyang meulhoe baroe mandum. Sinoe neu klik neu baca berita aneuk sikula ji meurhom-rhom batee bak jalan.

Tema nyang geucok untuk kegiatan kalinyoe, seubab meu sigö ngön mulod, "Berbagi Untuk Kemanusiaan, Sehat Sambil Beramal". Nyan ban neukira ju. Bek pajoh mangat sagai bak mulod, beu na amai, salah saboh jih donor darah.

Geuchik Meunasah Dayah, Rifian Nurdin atawa Geuchiek Yan seunang geukalön meunyoe aneuk muda na kegiatan lagee-lagee nyoe. Dan geuharap beu na sabee kegiatan lagee nyoe. Bek teubeh aneuk muda lam gampong. Jadi geuchiek Yan peugah, nyoe acara model nyoe le that manfa'at. Seubab deungön darah awak nyoe, jeut bantu ureung laen di rumoh saket nyang peurle keu darah.

Pak Dani Geulanggang seulaku ketua Karang Taruna Kabupaten Bireuen pun na geujak, na geu donor sit meu saboh kantong. Geupeugah le gobnyan, nyoe harus beu ji ikot le awak karang taruna laen. Aneuk muda beu aktif lam kegiatan nyang na meunafa'at. Pu lom jinoe ka na bantuan dana desa. Jadi aneuk muda beuna kegiatan-kegiatan nyang positif, bek sampe abeh watee dum aneuk muda lam gampong, bak meu'en game bak panteu jaga atawa nonton bola bak keudee kupi.

Meutuwah that aneuk muda gampong nyan, seunang Apa Raban meunyoe le aneuk muda gampong laen nyang peugöt kegiatan model-model na meunafa'at lagee nyoe. Nasaja nyang jeut ta cok meunafa'at. Meutuwah.

Nyan bak kabarbireuen.com Apa baca, ata geu share le pak Sekdes gampong nyan, seubab na meu rakan bak facebook, maka Apa Raban teupu.

Share this post