That Na Teuh, Gaji PNS Ji Ek, PGRI: Bek Jak Pasoe ie Lam Punggong Kamoe
Nasaja Berita - Jakarta, Nyoe kop bereh lom berita. Han ek ta khem neu kira ju nah. Nasaja pokokjih. Pemerintah pusat sideh di Jakarta ka ji umumkan 2019 ji ek gaji keu PNS sampe 5%. Nyan ka ji pastikan le awak pusat. Teuman komentar le ketua PGRI, pak Didi Suprijadi, hana suah saree. Seubab tan arti dum nan i ek.
Ji ek gaji 5%, ji ek yum barang 7%. Meunyoe kheun awak ekonom-ekonom nyan inflasi istilah jih. Di geutanyoe gampong pat na ta tu'oh inflasi, teurasi nyang kayem ta deungo. Meunyoe Apa Raban irigasi, seubab laloe lam blang jak lhob ie lam lueng. Hai lueng ken irigasi ji kheun le awak nyoe jinoe. Tah na teuh. Beh ka, gisa bak set.
Teuman peugah le pak Ketua PGRI nyan. Beh bek ile, PGRI na neu teupu? Persatuan Guru Republik Indonesia, nyan keuh nyan PGRI, bek eunteuk ta peugah-peugah PGRI, teupu tan.
Jadi geupeugah le gobnyan meunyoe dum nan ji ek, saban lagee ji pasoe ie lam punggong. Jeut peu ek, beu leubeh bak inflasi. Hai di ateuh 7% lah. Meu 8, 9 atawa 10%. Pokok jih diateuh nyan. Meuhan sama dengan tan sit. Nan sagai ji ek gaji. Surah pasoe ie lam punggong nyan surah basa Aceh, bek neu terjemah lam basa Indoneh, Masukkan Air Dalam Pantat. Han ek ta khem neu kira ju.
Seubab ken pu nah,meunyoe gaji niet that, terutama keu guru, nyan han ek jikarat di guru neukira ju. 2,1juta droe sagai guru. Laen awak honor-honor nyang tan gaji dum. Lagee di na awak gampong Apa Raban, watee ta eu tiep beungoh rapi keudeh. Ta tanyong gaji 200ribe si buleun. Nyan pih meunyoe na cae 3 buleun si ge. Teuman ken 600ribe sagai. Jak tiep uroe tuhan, awai jih ngen awak peuhah pinto ret rumoh sikula. Weuh teuh ta kalon.
Adak meu ijak u blang, lam 4 atawa 5 buleun i teume peng meu 3 juta, teuman ken ka rayek gaji awak jak u blang. Nyan meunyoe jak blang gob. Hai teuman lam leuhop lam tarek uroe pat na soe tem teuman lom. Pu lom ka sikula manyang-manyang S1 eh-hoe u Banda Aceh lom.
Teuman bek that meu pep-pep Apa Raban, kalinyoe nyankeuh nyan berita neu kira ju. Nyan Apa Raban kalo berita bak RMol. Teuman meunyoe kalheuh ta tuleh lam basa Aceh, keupu neujak baca lom lam basa Indoneh, teuböh watee-watee neuh. Lam basa droeteuh hana meudaleh.
Nasaja neu kira ju. Nyan awak PNS nyang keuneuk luloih bek seunang that, gaji niet that geupeugah le Pak PGRI jeh. Khak.
0 Response to "That Na Teuh, Gaji PNS Ji Ek, PGRI: Bek Jak Pasoe ie Lam Punggong Kamoe"
Post a Comment