MEMANG NAH HAJI UMA MAMPU. KA TROK JAK SAWEU DAYAH TUTONG DI PIDIE JAYA
Nasaja Berita - Pidie Jaya, Alhamdulillah that, kalinyoe bantuan ka meutamah laju-laju trok keu dayah Ummul Ayman II di Pidie Jaya, pimpinan Waled NU Samalanga. Baroe na troh senator RI, dari Aceh, Pak Sudirman, nyang ka lazem geutanyoe turie deungon nan Haji Uma eumpang breuh.
Kalinyoe hana geuba bang Joni atawa Yusniar, geujak droe sagai, Pu lom bang Thaleb si kumis keukarah, sit hanjeut sagai sapat ngen Haji Uma, seubab hana glah lom yum leumoe. That na teuh.
Haji Umar kalinyoe geujak keumunjong, geujak kalon kiban kondisi aneuk beut nyang tinggai di Dayah nyang ka tutong uroe Jum'at baroesa. Na geu ba bantuan. Na lah bacut sapu. Na geu sumbang seudeukah, ka hana le that, seip lah keu bacut-bacut sapu.
Ta harap beu rame lom, ureung-ureung nyang meupeungaroh lam pemerintah, ureung-ureung nyang Allah brie kaya dan leubeh kemudahan bacut sapat, beu geu bantu dayah nyang tutong.
Haji Uma kalinyoe geu ek lom keu DPD. Teuman, nyoe Apa Raban peugah, bek brok zhan neuh keu Haji Uma. Bek na pikiran, nyan geu bantu seubab keuneuk ek lom keu DPD. hanjeu meunan brok ate tanyoe. Nyan ka geubantu, rayek that tuah, rayek that manfaat keu aneuk beut. Pu lom nyoe teungoh musibah lagee nyoe. Nyang golom-golom bantu, bek tuwe, neu hubungi ju soe-soe nyang mungken.
Nyan neu kalon kiban sambotan dari ureung dayah keu haji Uma, lam musibah, ureung geutanyoe Aceh sit that mulia. Teutap na budaya peumulia jame. Meukhanduri bah pih lam musibah, kiban peumurah sifeut nyang Allah ta'ala brie keu ureung Aceh. Sampe-sampe aneuk miet nyang lewat manteng teuseuh'eh that bak ji kalon Haji Uma teungoh geu 'ap bu.
Nyan ban Apa Raban peu ek beurita. Ka dua uroe hana Apa Raban peu ek berita. Sibuk that pikiran bak pike peuglah hutang. Sampe-sampe rhet keu saket badan.
Nasaja Berita nyang harus ta peu ek, cuma hana meuteume peu ek. Neu meudoa beu sihat sabee Apa Raban hai rakan-rakan syedara meutuwah.
0 Response to "MEMANG NAH HAJI UMA MAMPU. KA TROK JAK SAWEU DAYAH TUTONG DI PIDIE JAYA"
Post a Comment